消費券|大商家銷情暢旺 小店嘆未受惠:個個都去買奢侈品

撰文:孔繁栩
出版:更新:

政府派發第二期消費券,今日(3日)迎來首個周日,適逢「十一黃金周」三天連假最後一日,觀塘apm人流暢旺,蘋果專門店外「大打蛇餅」,排隊近半小時才能入店。相反,一橋之隔的觀塘廣場則相對冷清,有時裝店老闆慨嘆消費券只幫助大商店,未能推動市民光顧小店,「個個都走去買奢侈品。」

+10

apm人流湧湧,蘋果專門店外大排長龍,市民要排隊等候近半小時才能進入,不少人都用消費券買心頭好,市民Herny用3000元消費券再另加3000多元現金,購買最新型號平板電腦,他指一直都想買新機,等了數個月終於等到消費券到手,「有消費券平咗好多,原價6000幾蚊,我只係畀3000幾蚊就有,當半價啦。」

市民Herny用3000元消費券再加3000多元現金購買最新型號平板電腦,當半價購入。(孔繁栩攝)

市民余小姐亦用了消費券買電子手錶饋贈,余母坦言5000元消費券並不足夠,「買下衫、買下嘢食都使晒,梗係愈多愈好啦。」期望政府會推出新輪消費券。

有大型電器店職員指出,政府派發消費券有助刺激消費,更帶旺一些「十年都唔換」的家電銷情,「嗰啲i 乜an乜,有無消費券都有人買架啦,你派咗錢咪當賣多幾部囉,但你屋企啲電器幾耐無換?」

職員又指,以往要顧客花3000多元或上換先進吸塵機「已經牙痛咁聲」,但換手機卻很疏爽,「以前邊有人換吸塵機,依幾個月真係多咗客嚟換,1號(第二期消費券派發)到今日我都賣咗十幾部,大家以前唔捨得,依家咪當政府送囉。」

時裝店老闆陳先生表示,消費券幫助不算大,市民主要都是去買奢侈品。(孔繁栩攝)

不過,在毗鄰的觀塘廣場人流則相對較少,時裝店老闆陳先生表示,消費券幫助不算大,生意額與以往相若,「消費券幾千蚊,都係去晒買奢侈品,邊會幫襯我哋呢啲小舖。」他指今日的顧客中只有兩人用消費券,消費金額不算大,「都係幫到啲大連鎖店,個個都趁有錢買貴嘢。」

另有小型電器店負責人表示,觀廣內售賣的電器比大型連鎖店較便宜,以往吸引不少顧客來格價購物,但在派發消費券後,情況略有改變,「政府派錢就唔使睇價錢去買嘢,更加唔使特登走入嚟,隔離apm都買到,仲要勁減價搶客,我哋呢啲細舖真係享受唔到」。