安心出行|九龍公園泳池大部份人主動舉機 泳客:話唔識用就假嘅

撰文:林穎嫺
出版:更新:

康文署轄下18類場所今(1日)起跟隨政府規定,強制入場人士掃描「安心出行」二維碼。早上的九龍公園游泳池人流不多,大部份人入場前主動舉機掃碼,只有數名長者稱無手機需職員協助「填紙仔」。
有泳客批評措施擾民,若日後進一步增加程式權限將暫停游泳,轉做其他不用登記個人資料運動。
不過,亦有長者稱早已習慣使用安心出行,認為配合政府才能有效抗疫,程式亦容易使用:「我都係長者嚟㗎,我都識用啦,啲人話唔識用就假嘅。」她又批評不少人在表格上填假資料,又散播私隱疑慮等陰謀論。

大部份人主動舉機掃碼 也有人怨麻煩

九龍公園游泳池今日早上人流不多,一小時內約30人到場游水,大部份為較年長人士,他們入場前主動舉起手機,掃描「安心出行」二維碼,不需職員提醒,過程大致暢順。惟亦有數名長者沒有手機,需要在職員協助下「填紙仔」,他們期間埋怨:「又搞多樣嘢,好麻煩。」職員即安撫回應「冇辦法,都要做。」

早習慣安心出行 形容過程輕而易舉

游泳常客陳太表示,早已習慣使用安心出行,以往前來游泳已會自行掃描,認為整個過程輕而易舉:「我都係長者嚟㗎,我都識用啦,啲人話唔識用就假嘅」她補充:「冇麻煩,有咩麻煩啫,安心出行喺個牌度嘟一嘟,好快趣,都唔使一秒鐘就搞掂喇。」

我都識用啦,啲人話唔識用就假嘅。有咩麻煩啫,安心出行喺個牌度嘟一嘟,好快趣,都唔使一秒鐘就搞掂喇。
泳客陳太
數名長者稱無手機,需在職員協助下「填紙仔」。(林穎嫺攝)

洩露私隱說法是陰謀論 泳客:填紙仔有乜好?

對於有市民憂慮安心出行有私隱疑慮,傾向「填紙仔」,她批評有關想法只是陰謀論:「填紙仔有乜好啫,你填『林鄭』、填啲鬼五馬六嘢,填啲唔真實嘅嘢,填嚟做乜?都廢嘅。」

有人憂權限擴大 屆時改做不用紀錄運動:行山同踩單車

另一名泳客關先生則批評措施擾民,亦理解年輕人的私隱疑慮,惟認為他已退休,無重大秘密不可披露,便順應政府的做法:「我哋老人家冇乜所謂啦,入去要簽到,寫紙仔又麻煩,安心出行就方便啲。」惟他亦憂慮政府會參考內地做法,增加安心出行的權限:「暫時我覺得仲可以嘅,如果我覺得有需要保護私隱唔用住。」雖然是游泳常客,但他指屆時會改做其他不用紀錄行程運動,例如行山及踏單車等。