193被疫情拖累cafe開張無期 裝修零進度超崩潰:每分鐘都係錢!

撰文:趙允琳
出版:更新:

男團ERROR成員193(郭嘉駿)早前與友人投資七位數在紅磡開cafe,然而原定於2月開張的計劃卻再次因疫情而延遲。日前他和肥仔一同以視像形式接受ViuTV節目《今日疫情》訪問時公開現時cafe的裝修進度嚴重落後,無法估計何時才能如期開業,令他這位老闆非常崩潰:「delay勁多,每分鐘都係錢嚟㗎嘛!」

193趁農曆新年開舖賣應節物品。(IG@deniskwok193)

193接受視像訪問時身處cafe中,並透露因疫情影響導致多名中港司機確診無法上班,嚴重影響運輸和鋪頭的裝修:「本身預計2月尾開,點知因為疫情,我已經盡量搵晒喺香港做到嘅工程,但有啲嘢迫於無奈香港冇得做都要喺內地訂,然後中港司機又中招,搞到(啲貨)運唔到落嚟,到而家啲貨去咗邊?仲未check到!」

193和肥仔以視像形式接受ViuTV節目《今日疫情》訪問。(《今日疫情》影片截圖)

他亦將鏡頭影向cafe內部,見到遍地凌亂不堪放滿裝修工具、零進度的天花板等等,而且全間鋪頭只有一面已完成的牆身:「完全乜都冇!delay勁多,每分鐘都係錢嚟㗎嘛!本身我係億萬富翁,而家搞到我好窮啊呢排!」

193公開凌亂不堪的cafe內部。(《今日疫情》影片截圖)

主持人陳俞希和陳安立問有沒有能夠自己落手落腳做到的事情,193無奈表示自己能做的都已經盡做:「喺香港DIY整到嘅嘢,建築工人已經做晒,要裝嘅都裝晒,係等緊啲料到,真係因為有啲材料運唔到嚟香港,而且真係有建築工人之前中咗招,所以佢哋停咗工一排,搞到delay好多。」肥仔提議叫保錡來cafe幫忙,不過193強調叫他來亦沒有用:「而家係冇料,唔係唔夠人,枱凳都運唔到落嚟!」

點擊觀看更多193 cafe內部的照片:

+16