酷熱天氣｜愛民邨公屋單位裝4部分體冷氣機 網民：真係咁熱咩？
撰文：卡洛兒
出版：更新：
近日天氣持續炎熱，每日都達34度高溫。有何文田街坊發現，愛民邨有單位安裝了4部分體式冷氣機，不禁好奇「愛民邨真係咁熱？」，但有網民就猜測可能另有用途！
有何文田街坊發現，愛民邨有單位安裝了4部分體式冷氣機，不禁好奇「愛民邨真係咁熱？」（FB「何文田街坊」圖片）
有網民在facebook群組「何文田街坊」上載兩張照片，只見愛民邨2個不同單位外，分別安裝了3至4部冷氣機，忍不住問「純好奇問下，請問愛民村真係咁熱，熱到要裝3-4部冷氣咁多咩？」。
有網民在facebook群組上載兩張照片，只見愛民邨2個不同單位外，分別安裝了3至4部冷氣機。（FB「何文田街坊」圖片）
照片引起網上熱議，有網民都表示誇張，「我成日坐8號小巴經過見到都唔明，點解戶戶都裝咁多部分體，單位面積頂多都係400多呎，有需要裝咁多咩？」、「愛民得嗰二三百呎，四部冷氣？佢裏面要維持室溫攝氏5度？」。更有人懷疑是否有其他用途，「入面係礦場？」、「養咗啲怕熱寵物」、「係咪做咗凍倉？雪凍肉或者日本水果」、「劏開出租了？」。
不過有人則認為樓主大驚小怪，「每間房一部？」、「大單位正常都3部，如果間咗個廳就4部」，亦有街坊認真解答，「康文樓大單位梗房都兩個，咁可能佢再間多啲房，一間房一部分體」、「另一個問題係，佢嗰個位置可能係西斜，由朝曬到晚，曬到正都幾熱㗎」。