【德國生活誌】德國公路無限速 開太慢反而危險

撰文:陸小菲
出版:更新:

小菲聖誕節後跟朋友聚頭外出用餐,講明一點半開門的餐廳 1:29pm 還是關着門。同樣喺度等門的德國大叔見我們一臉亞洲樣怕我地唔知規矩,友善地笑住同我地解釋要等多一分鐘,「'coz we're German.」

德國人就係咁,一分鐘就係一分鐘。守規矩同準時都係德國人最完美的典範同美德。因為本性規規矩矩,見你擔屎唔偷食咯,咪索性俾你去得盡啲更自由囉!咁當然,講到自由氣氛緊係荷蘭優先,德國相對就無咁放開,但講到開放,德國都有住全世界最高度自由的地方,就係聞名於世的無速限的高速公路。對喺香港日日因為塞車而耗盡寶貴的光陰,一條可以開得快的公路真係同時間對抗的最好寶物。2016 年香港的交通意外傷亡數字就已經超過二萬,事故多就塞車多,一出事就搞到路面癱瘓,都咪話唔濕滯;香港睇嚟都要檢討下道路發展上的問題。

德國著名車牌:保時捷(Porsche)(上排左)、福士(Volkswagen)(上排中)、Audi(上排右)、寶馬(BMW)(下排左)、Ben士(Mercedes-Benz)(下排右)。(網上圖片)
+3

擁有所有可以開快車的條件

德國小妞 M 以自豪的民族精神同我講,德國人真係完全擁有可以開快車的所有條件。唔係因為國民有超群的駕駛技巧,而是因為德國人對規則的遵守,令佢地可以自信到響高速公路不限速。

首先,德國人以本土的汽車質量超班超卓自居。喂,德國作為歐洲最大汽車生產國,咁多名車廠牌——Audi、寶馬、Ben士、福士、保時捷……如果只可以 90km/h 行公路豈不是對國家工業的褻瀆同侮辱?正所謂只要使用道路守規則,開車準繩又小心,就算開得快,意外都唔會發生。

第二,德國身為作為最早建設高速公路的國家,加上德國人的人民精神,可以睇得出佢地對自己的工業態度有幾咁嚴謹;呢個凡事注重質量的國家,當然在公路的設計和修建來說都係非常優異。條路起得好,自然無煩惱;開車都開得暢快過人。

第三,以嚴謹著稱的國家當然對規矩的遵守額外用心,公路上幾百個檢查站不特止,查出超載更會嚴格處罰——只要兩次犯規就監禁三個月,嚟到三次則 blacklist 永久 bye bye 不能再從事駕駛行業。小妞 M 提醒小菲,喺德國揸車盡可能靠右側行駛,想爬頭先用左邊中線同快線。其實喺德國高速公路開得太慢反而更加危險啊。

無限速路牌(Awoosh.com擷圖)

快車 250km/h 不是夢 人人都去德國飛車

德國高速公路的出事率唔高,而家大家都普遍認為架車開幾快,好應該係以車的情況 + 路面狀況 + 駕車者配合決定。所以都無限速了,你鍾意開幾多都係你嘅事。但小菲建議大家最重要都係小心駕駛,因為呢個世界真係無論你開幾快都總會有人快過你;咁你爬頭時睇唔切有咩車後飆出嚟就為時已晚;而且如果長期高速行車,啲油(同啲油錢)真係倒得快過水。德國每個車道都有自己的最低限速,貨車、大車通通都安分走最右側慢車道。小妞 M 同我講,無限速的公路開 200km/h 係基本,公路上開 200km/h 重時不時會有人過你頭。但係德國人好規矩,飛車過你頭事少,唔會推你車事大;真係你有走你的楊關道,我有走我的獨木橋。唯獨小妞 M 同我講,近半年在公路上多咗遇上瑞士來的飆車黨,對方一入德國國境就飛速前進,跟得太緊不得止還在推推推推推,對好守規矩的德國人來說真係又驚心又煩惱。

香港去機場嗰條路最高可以開到 110km/h,道路守則唔係個個都遵守大家都心知肚明。市區高速路在周末深夜都成為香港的非法賽車道,年輕有誰無飛過一轉大清水?小菲都 MK 過,十幾歲女在企起身將頭伸出天窗體驗高速快感(小菲年少無知而家諗番起真係慶幸當年無發生意外,亦好意勸告大家咁 MK 的事真係唔好學唔好做唔好累人累物),後來的士大佬開得快過 130km/h 小菲個心都跌埋出嚟咁滯。

而家總算真係可以體現德國高速公路無速限的快感,但承上文,的士大佬開得貼緊 150km/h 小菲都準備要窒息了,都係搭番火車安心啲。不過如果你想安全地開快車,德國真係讓你體驗真正的無上限。尤其係小鎮邊的公路,真係可以俾你感受到無限制的高度自由的好處。但當然,如果講到挨近大城鎮的路段,都會通通設番速限保障安全。而最近,德國政府都因為發現瑞士人揀嚟德國瘋狂飆車個個都嚟做頭文字D都唔係好掂,所以終於決定喺部分無限速的公路都定番咁上下的速限,保障番國民同大眾的安全。新的一年,小菲都祝大家出入平安。

(本文純屬作者意見,不代表香港01立場。)