因照顧中風母親12年來未曾離港、拒絕海外交流：換到媽咪仲喺身邊
「照顧者」，因葵盛東邨的倫常慘案再次成為談論的議題。既為安老院舍社工、又是中風母親照顧者的阿肥，過去12年的生活離不開安老院舍，負起幫母親沖涼、換尿片的責任。
不少人會對「照顧者」予以安慰，但原來「睇開啲」、「去下旅行喇」對照顧者而言，或許帶來的只是反感，不是安慰。阿肥過去12年的生活離不開安老院舍，為照顧母親斷言拒絕海外交流機會，換來是上司的訓話。
當一個人最無助的時候，阿肥表示，當刻最需要的一句說話，或許只不過是：「你放心，我喺你身邊，你有咩搵我幫手。」
阿肥母親自2005中風後，阿肥對肥媽的照顧無微不至，她憶述，母親曾服食抗生素後一日痾七次，她特意請假照顧母親，為的只是當母親肚痾後，即時為她換尿片。
在旁人眼中，阿肥或太緊張，但易地而處，面對受苦的是自己的母親，阿肥只想盡力給予最好照顧。阿肥解釋，院舍只會每天在指定時間為長者換片，曾有長者因肚痾、尿片罨得太久，屁股損傷嚴重至要特意洗傷口：「包片(屁股)好易損，自己做得幾多得幾多。」
12年來未曾離港 拒絕上司推薦海外交流
對他人而言，換尿片看似微小的事，但在照顧者眼中，每樣被照顧者的事均與自己息息相關。不少港人愛好旅行、外遊，但為照顧母親，阿肥過去12年從未離開過香港，甚至連直屬上司最近推薦她到海外交流，阿肥亦斷言拒絕，卻換來直屬上司的不體諒。
上司質疑「無晒自己」
「你都要有自己生活先得，你為你媽媽無晒自己點得？去一星期姐！」阿肥直言：「一日都唔得！」她不諱言，直屬上司的說話令她感到被教訓、覺得反感：「唔係你所諗咁簡單，佢一廂情願覺得這個方案適合我，『俾啲機會你去旅行，放鬆下自己啱掛，而且推薦你去，唔係嗰嗰同事有機會，睇好你先讓你去』，但對我嚟講，係唔體諒我先要我去。」
「佢會覺得好可惜，你應該有更加好發展！」阿肥表示，在旁人眼中，她可能為母親放棄甚多，然而對她而言卻是「交換」，「我換到我媽咪仲喺我身邊。」
阿肥直言，對照顧者而言，身邊的朋友、同事、院舍職員能給予體諒與支持，接納自己的決定，已經可以很不一樣。
聽到「睇開啲」、「你放開少少」覺反感
「我唔會同人講『睇開啲』，有朋友同我講『你放開少少』、『去下旅行喇』，我聽到覺得好反感。」阿肥表示，自己會以「你都已經做得好好」、「你都俾返啲空間自己」、「你自己病左點算？」等去鼓勵照顧者。
感慨每有悲劇發生 社會只關顧一個月
葵盛東邨的倫常慘案引來社會對照顧者的關注，阿肥過去在Facebook開設專頁「小北斗夜空」，便是帶著她心底小小的使命：「社會上發生的事，唔係要去到慘劇先去關注，一單慘案就即刻引起好多人關注，但啲人好快又唔記得。次次都係出咗事，四方八面嚟話你呢到做得唔夠，但一個月後就無咩人去關心，俾好多野蓋過咗，其實係咪可以keep住呢嗰關顧的氣氛？」
曾探訪不少有自殺念頭的長者
阿肥表示，過去曾探訪不少獨居長者，部分想過自殺：「佢最後無死到，因為佢發現仲有個姑娘會嚟探我，其實有時只係一刻間。」
社工亦不過是個人，她坦言，自己亦曾有同樣念頭，但直言：「當一個人最無助的時候，有另一個人出現，同佢講：『你放心，我係你身邊，你有咩搵我幫手。』成件事會好唔同，呢一句好緊要。」
照顧者亦需被照顧
除心靈支持，照顧者同樣需要被照顧，阿肥認為，現時有關照顧者的資源只集中於講座、小組等，但對她而言，照顧者最需要的是時間與實質的幫助：「例如我病咗，係咪有人可以幫手睇住我媽媽？」
政府現提供送飯、清潔、陪診等資助社區照顧服務，但平均輪候時間長達11個月。阿肥表示：「對我最大的支持，係有人肯免費義務去照顧我媽咪。」
