黃致列香港演唱會直播除褲又騷肌 深情獻唱雲畫的月光OST

撰文:鄧樂宜
出版:更新:

如果要用一句話概括昨晚韓國歌手黃致列來港舉辦的第一場香港演唱會,應該要話係一個又好聽、又好笑嘅演唱會!黃致列擁有一把滄桑嘅歌聲,識別度高之餘仲出名唱歌超有感染力,當晚佢一共唱出16首歌曲,包括電視劇《雲畫的月光》OST《想念想念你》、自己嘅熱門曲《每天聽的歌》,仲有佢喺《看見你的聲音》入面唱過嘅《苦海》等等,令嚟到九展Star Hall睇騷嘅粉絲,真係「耳朵懷孕」咗兩個半小時。

攝影:林迅景

黃致列聽粉絲大合唱時加把口教粉絲轉音,佢仲考粉絲聽唔聽得出自己唱《雲畫》OST時有調音,果然係唱歌老師!
黃致列唱《角》時跳撒嬌舞,仲話自己已經36歲,但粉絲眼中自己係3歲。

黃致列喺8點左右準時開騷,一開始就跳唱出《BangBangBang》,接住就用韓文、國語、廣東話向大家打招呼:「大家好,我係黃致列!」曾經參加過大陸節目《我是歌手》嘅佢,全程「國語半、韓文半」咁同大家溝通,黃致列唔單止歌聲係「女心狙擊」級別,連用國語講說話都一樣咁嘴甜舌滑!佢話:「祝我每天每天都做粉絲夢!我真的喜歡粉絲,我中文愈來愈好,一點點地進步,但我喜歡你們的心,是愈來愈快!快!快!」氹到台下粉絲一片笑聲!

黃致列唱到high向粉絲潑水又丟毛巾,仲幾次走到台下,喺粉絲堆中間唱歌!
+18

記者可以肯定,黃致列真係好重視佢嘅粉絲,因為這晚嘅演唱會上,佢不但大派福利多次落台走入觀眾堆獻唱,又不斷將自己抹過汗嘅毛巾、飲過嘅水樽丟下台送粉絲,仲笑話:「來黃致列演唱會可以得到毛巾,你們可以拿回去沖涼。」黃致列仲為粉絲做咗一般韓星都唔會做嘅表演,就係直播後台換歌衫!黃致列竟然俾鏡頭跟到入後台嘅更衣間,雖然有帷幕隔住,但依然見到佢換衫除褲嘅剪影,成個過程一刀未剪透過大熒幕播出!尖叫吧!黃致列換完衫之後都忍唔住問粉絲:「有啲黃,係咪?」開演唱會開到咁有綜藝feel又咁冇底線,難怪粉絲都睇得好開心!

「不是我唱得好,是你們造就了我。」黃致列真係好識講說話!
黃致列話11-12月左右會推出中文專輯,仲賣花讚花香:「特別好聽!」
唱《苦海》之前,黃致列感性咁話:「因為這首歌,我才能與大家相遇。」

(觀看更多)

黃致列跟姜丹尼爾@Wanna One B-Boy對決 導致鎖骨部位韌帶受傷

如果單單呢個環節就已經心跳加速嘅粉絲,接下來嘅表演就更加小心心臟受不了喇!因為黃致列跳唱《Kiss Me》之後,不斷「掟」飛吻俾粉絲,甚至扮機關槍發射飛吻!佢仲用國語話:「我真的特別性感!」而稍後黃致列跳唱《Honey》,就證實咗佢真係性感!因為佢唱到一半直接掀起上衣,只著住黑色外套「開中門」跳舞!事後黃致列仲話本來不打算騷肌:「頭先我個肚一直用力!我睇到大家嘅眼神叫我脫,我就諗除唔除好呢,最後唔理咁多喇!」佢承諾12月台灣場嘅演唱會上,會練好肌肉再脫過,仲約定粉絲到時要一齊行夜市!最後黃致列同全場粉絲大合照,安哥用國語唱埋王力宏嘅《改變自己》同張學友嘅《一路上有你》,為這晚的演唱會劃上完美句號。

我們01韓迷的facebook專頁Kpop 01已經開始喇!想知道更多韓國娛樂、飲食、玩樂、時尚資訊,快點去給like吧:https://www.facebook.com/hk01.kpop/