【網上情緣騙案】點解唔扮投行才俊扮暖男？因為暖男先呃到你
女人唔開心會買嘢，或者食嘢。聽聞梁朝偉唔開心就坐頭等去倫敦，餵一個下晝白鴿，唔過夜即晚返嚟。以前識個富二代，唔開心的話，朝早就求其拎幾百萬去買期指，睇心情買升定跌。
我呢？我唔開心時，減壓嘅方法，就係去各大女性Forum睇故事。同梁朝偉一樣，唔出聲（我連飼料都慳埋）。
姐妹講嘅，除左永恒嘅女同事唔知搏乜，有人想搶男朋友，老爺奶奶好惡頂外，近年仲多咗樣野：騙案。騙財騙色都有。但騙色嘅，老實講，都係各自表述。你心目中係佢上完床就走人，佢心目中可能由頭到尾只當炮友。你覺得佢好冷淡，其實佢覺得你好惡頂，誰是誰非都真係好難講。
騙財就唔同啦。借咗錢唔還人間蒸發，冇得兜。更有趣嘅係，我見好多騙財嘅故事，根本係見都未見過個「男朋友」嘅！咁都得？財務公司都要現身啩？更何況，未見過嘅，都叫「男朋友」？有冇咁浪漫？
讀者大約估到，呢啲，就係近來好興嘅網上情緣騙局。以前騙財仲要拍拖然後忽然話你知有絶世發財好橋，有神奇藥水可以洗美金，或者在黑龍江個三叔死咗佢好有錢答應分錢畀我哋，但就偏偏爭兩皮嘢搞死亡證。
最新嘅呢？現身拍拖都慳返，全程網上搞掂。可以係英美紐澳加猛美男，係外交官或者高層，永世又係有一大筆錢但爭幾萬蚊疏通。或者送一大堆禮物畀你（而家先進到可以畀埋張單你睇到有iPhone有Tiffany），但又係畀萬惡的海關截咗要畀幾萬蚊清關費。變種嘅，要現身嘅，就係捉你上去做Facial，然後由美容嬸嬸幫你碌卡做返特製療程。我心諗，男人老狗做乜春Facial？
當然，當局者迷，好多騙案望落都好好笑，正如你睇人在街度出醜都好好笑——直到你自己係主角。但凡見到呢啲新聞，平時叫人唔好Blame the victim嘅都會第一時間出嚟抽水，恥笑當事人咁低智商，咁都信。
問題係，而家唔係講猜猜我是誰之類嘅內地騙案（側聞好多受害人財富來源都唔多妥，如是我聞）。 呢類網上情人或Facial騙案，好多受害人都係事業女性，企業高層專業人士之類。照計唔係牛頭角順嫂。點解，真係咁都信呢？
就係，衰在一個情字咯。就係，因為人哋係「暖男」。姐妹一見（其實都未見）就春心動了。 其實兄弟都有機會中招，但男人孤寒自私又鹹濕，見到未見過掂都未掂過嘅女神，拎幾萬蚊，難啲。
點解暖男會呃到你？ 因為你只願意睇到你想睇到嘅嘢嘛。開講都有話，邊有咁大隻蛤乸隨街跳？ If something sounds too good to be true it probably is。
我唔會衰到叫人照下塊鏡自量下先。事實係好多漂亮溫柔嘅女仔都同大肚腩嘅賤男阿叔一齊。女人貪錢？或者。但一樣唔少型男暖男都同啲表面無甚出色嘅女仔一齊。愛情嘅嘢，好似降頭咁，好難講嘅。
追求夢想，自己雖則行年四十，但覺得有個善解人意又靚仔又有錢仲係陳奕迅英式口音嘅白馬王子等住自己，OK。發夢係冇錯的，六合彩都有人中啦喂。當事人願意蹉跎青春等奇蹟，本身唔係最大問題。
問題係，識王子都要去舞會啦。白馬王子唔會三唔識七Whatsapp你或者Facebook Inbox你嘛！
真的，信童話信王子鍾意平凡嘅自己唔係錯。但驗過王子真身未先？你網上個暖男，好可能係個在印尼或非洲R住腳趾上網嘅阿叔！屋企仲有成隊籃球隊等佢（即係，等你）開飯。
現實啲講，同型男出嚟拍拖畀人呃錢，至少都眼睛食過冰淇淋。況且，型男時間都寶貴嘛，你都佔用咗佢，當係貴啲嘅伴遊咯。最不能接受嘅係，幾萬甚至幾百萬咁匯畀過見都冇見過嘅人。
追求暖男冇錯，但，唔該，快手焗佢出嚟見面。唔肯見嘅，九成有古怪。要求見面係個好好嘅測試。首先你可以肯定佢真係靚仔高層，二來，騙徒都要成本，取易不取難。網上廢話簡單，一溝一百都得，要出嚟食飯傾計先呃到嘅，成本都太高了，好多騙徒都放棄。
另外，再三強調，望落too good to be true嘅，多數都係。騙徒都利用咗呢種心態。而家最煞食嘅唔係高帥富劉鳴煒，唔係投行才俊，而係打份普通工嘅「暖男」。「暖男」有乜特色？ 唔好太靚仔太chok，唔好周栢豪咁。 但要心地好。 點表達心地好？貼下自己去索馬里做義工啲相呀，或者探訪老人院，同阿爺阿麻食飯嘅相呀之類。養埋寵物就無敵。養貓好過養狗（唔好問我點解）。最好識玩樂器，鋼琴太chok，拉二胡嘅似乞兒，電結他貝司似飛仔，木結他或Ukulele之類最好，夠文青。
點解唔扮投行才俊扮暖男？就係道高一尺魔高一丈。扮金融才俊富二代你會覺得too good to be true，扮暖男就好似唔係——雖然其實都係，否則你唔會仆到去。做乜咁沉迷？因為你冇乜遇過。
出年係金融海嘯10週年，2008其中一位風雲人物，係你都可能聽過嘅馬多夫（Bernard Madoff）。馬多夫乜水？其實就係金融暖男騙徒。佢嘅手法只係好簡單嘅龐氏騙局，呃新會員嘅錢，拎去畀舊會員扮投資回報。但金融暖男畀其他人優勝在邊？點解呃到人咁多年？呃嘅多都係有頭有面嘅投資者喎。就係因為佢特登整到啲回報唔好太高！每年升幾個開，就好似投行才俊咁，係人都估到騙局啦。佢就特登做到唔好太高，扮暖男，降低你防備心。你會覺得，「佢係呃就作大啲啦」——佢就係利用呢種盲點。
村上春樹嘅名句：
與其貧乏的真實，我更愛華麗的虛偽
人只係睇到自己想睇到嘅嘢。行山做義工養貓玩音樂嘅暖男聽落幾好，但有冇諗過人哋Facebook係佢想畀你睇到嘅一面？粗口爛舌放假訓到四五點唔做運動嘅未必係好人，但應該真實嘅（對，嗰個係我）。
（本文純屬作者意見，不代表香港01立場。）