劉嘉玲爆初出道被鄭裕玲鬧過：自此我更認真工作
撰文：冼燕珊
出版：更新：
鄭裕玲（Do姐）出咗名認真，連劉嘉玲都話初出道時好驚佢，Do姐日前邀請咗嘉玲上佢嘅電台節目，佢好直接咁問嘉玲：「我有無鬧過妳？」嘉玲話：「有，嗰時真係好細個，好貪玩，啲稿又難背成日背唔熟，您又出咗名勤力認真，真係背到個劇本滾瓜爛熟，有一次我背唔熟啲對白，俾你發現咗，問我：『你知唔知場戲講乜？』我當時勁心虛答您：『知知哋』。」Do姐問：「咁你有無嬲我？」嘉玲話無：「經歷果次，我自此就好認真對待我嘅工作。」睇嚟Do姐嘅認真工作態度都對嘉玲有正面嘅影響，嘉玲仲大讚Do姐有幾認真:「6點嘅通告，佢5點半就到，咁早到仲自己燙埋衫。」
嘉玲大讚Do姐工作認真，對佢有正面影響。(IG圖片)
其實Do姐同嘉玲之後就做咗朋友，間中仲會約埋食吓飯，Do姐出咗名養生，好早瞓覺休息，佢大爆嘉玲相反：「佢真係好貪玩，同佢食完飯，佢原來仲有下一場，一晚幾個飯局，又鐘意去蒲。」嘉玲就話：「好在我當年有去蒲，依家香港無咩好嘅蒲點，好懷念當年個個都著得好靚咁去蒲，依家無人咁做。」
+1
最後佢哋講起雖然大家都已經搵夠，但依然好熱愛工作同娛樂圈，所以從來無停過落嚟，好似嘉玲咁，就依然好活躍：「我好多嘢做㗎，要拍電影、廣告、真人騷、出席活動，仲有做生意添。」除咗呢啲，閒時仲有同發哥一齊行山，講起發哥，Do姐就投訴話邀請咗發哥上佢節目做嘉賓幾十次，但都約唔成，嘉玲話：「咁您搵發嫂安排好啲。」
嘉玲喺空閒時間鐘意去行吓山。(IG圖片)