【Kakao孤獨房】秀智貼認證相冇人信 泰民@SHINee慘被粉絲踢出房
喺韓國方面，韓國人一向用開嘅通訊軟件係Kakao，而最近喺Kakao上又新興一個「偶像聊天室」，叫做「孤獨的XX」，「XX」就係各大明星嘅名，例如係BTS防彈少年團嘅Jimin的話，呢聊天室就會叫做孤獨的Jimin。實際上唔少韓星都有親身加入過呢類聊天室，好似Highlight嘅梁耀燮、miss A前成員秀智、MAMAMOO輝人、玟星等等。不過SHINee泰民、Block B宰孝、朴經嘅情況就最搞笑，因為佢哋都試過畀BB.C（Block B粉絲）同SHINee WORLD（SHINee粉絲）踢出聊天室，但實際上又真係幾難令人相信自己偶像會用真名上聊天室同自己傾偈嘅。
事實上加入孤獨房先要解開房間密碼，亦要守孤獨房規則！例如喺孤獨房入面唔可以傳文字，只可以傳圖片，有問題想問的話就要寫係圖片上面，通常孤獨房入面都會有好多高清韓星靚相，除咗隨時有機會同自己支持嘅韓星存喺同一個聊天室之外，擁有大量高清靚相或者韓星舊相都係吸引各大粉絲加入孤獨房嘅理由。
尋日（23日）SHINee「忙內」泰民竟然驚喜現身自己嘅孤獨房，不過泰民一出聲就畀SHINee WORLD踢出房，因為泰民違規傳文字。但泰民應該好想加入自己嘅孤獨房，被踢之後換咗另一個帳號再次加入孤獨房，再加上自己嘅自拍照寫「太過份了，我只是開了個玩笑，快點重新邀請我吧」。成功再次加入孤獨房嘅泰民都有公開自己近況，指「我很健康，大家不要擔心」、「會盡快跟大家見面，不會讓你們等太久」以及「今天吃了冷麵」，又承諾會喺今年過去之前開個人Instagram，增加同SHINee WORLD互動機會。SHINee 4人溫流、珉豪、Key同泰民經過17日嘅「SHINee WORLD THE BEST 2018～FROM NOW ON～」巡迴演唱會後，都會繼續努力向前，堅強站喺SHINee WORLD面前！
而另一名加入孤獨房嘅秀智都有傳個人自拍認證照，以示加入孤獨房嘅真係秀智自己本人。當秀智粉絲反問自拍出處係邊到嘅時候，秀智就回應喺自己手機，同時都有粉絲回應呢張相無出現過喺秀智嘅Instagram上，秀智就再次回應「我係秀智」！而秀智喺孤獨房玩咗一陣就承諾會再嚟，然後就離開咗喇，如果有粉絲想等秀智下次再出現嘅話，就記得即刻加入秀智嘅孤獨房喇！
更多圖片
SHINee永遠五缺一東京演唱會今開唱 保留鐘鉉唱歌部份但需改編舞
下載《香港01》App，更多韓星靚相、影片率先睇！
我哋01韓迷嘅facebook專頁Kpop 01已經開咗喇！想知道更多韓國娛樂、飲食、玩樂、時尚資訊，快啲去畀like啦：https://www.facebook.com/hk01.kpop/