【書展2018】黃榕誓要洗脫嫩模形象　玩健身玩到健美比賽都拎獎

書展已經舉行咗幾日，今年一眾嫩模影嘅寫真集再度強勢回歸，但今年大家又覺唔覺得少一咗一個人呢？佢係邊個？佢就係出得最多寫真集嘅黃榕，佢每年都話最後一本最後一本，到上年佢真係冇再推出寫真集，今年佢亦冇推出，點解呢？如果有留意佢嘅朋友都知道佢轉戰健身界，但有乜原因令到佢唔再發展佢嘅寫真事業呢？係俾人批評得多呀？定係佢真係兌現承諾前年係最後一本寫真集呢？

當然都唔係只係得個講字啦，我哋《香港０１》亦特地搵黃榕（Gloria）做番一個專訪，而專訪內容大談當年Gloria當年赤裸影寫真事情，Gloria透露當時候影嘅寫真分別俾陳嘉蓉及周秀娜鬧，「佢哋話叫警察拉我，又鬧我有傷風雅」，Gloria自推出寫真後一直受唔少人批評，但佢本人其實覺得係一個美好回憶，「可能外界覺得我好cheep或者低俗，但始終市場係取悅男性嘅一本書，我覺得冇所謂，咁影完寫真我可以留低一個美好回憶。」　　　

宜家嘅Gloria已經轉型成功，早前更參選健美比賽得到第四名，佢自己都認同算係成功。Gloria直言：「人哋可能之前覺得我賣弄肉體，宜家就算我著少布都唔會有人咁認為，佢哋係睇我肌肉，唔係睇我有幾多吋事業線，係睇我肌肉線條，我宜家就算少布俾人感覺都係健康。」但要比賽當然要一個刻苦訓練，得出嚟嘅成就感係咪比寫真大賣更好？Gloria認同呢一點，「你要知道寫真賣8千本1萬本呢啲唔可靠嘅數字，就算推到上第一位，都冇喺呢個健美舞台上拎獎更有成功感。」