周秀娜入稟告經理人公司GME 拖欠355萬收入
撰文：洪曉璇
出版：更新：
娛樂圈經常發生金錢糾紛，呢日傳出周秀娜入稟，控告合作多年嘅經理人公司環球狂熱（GME Holdings Limited）毀約，拖欠其超過400萬收入，更要求法庭宣布佢同經理人公司嘅合約已經失效。
呢日傳出周秀娜入稟控告經理人公司GME。（周秀娜IG）
周秀娜自2008年以模特兒身份入行，推出寫真集一炮而紅，一直同經理人公司GME Holdings Limited合作無間。2013年成立周秀娜工作室，成功由模特兒轉型為演員，今年更有份角逐香港電影金像獎最佳女主角。2015年GME同蕭定一嘅中國3D數碼娛樂有限公司合拼，改名為GME中國，但周秀娜嘅經理人合約仍然歸GME所有。
自入行起周秀娜就同GME老闆ROY合作無間。（ROY微博）
呢日傳出周秀娜透過律師入稟高等法院，控告GME涉侵吞其超過400萬收入。入稟狀指，周秀娜於2011年尾同GME簽約，合約中定明周秀娜可獲工作收入60%，即經理人公司抽佣達4成﹗GME需於代收酬勞後60日內轉帳予周秀娜。但入稟狀中指GME未有將周秀娜應得嘅四百一十多萬收入交出，今年7月周秀娜曾發律師信追討，但只追回其中約60萬，所以決定入稟追討餘下355萬收入，並要求法庭頒領，同經理人公司合約已經失效。
2013年成立周秀娜工作室，經理人合約仍然歸GME所有。（視覺中國）
我地就事件聯絡過GME，佢地表示需要先行了解事件再作回應。而蕭定一嘅hmv數碼中國集團發言人回應：「我們是GME其中一個只佔10%股份的小股東，從來不牽涉GME的藝人管理，但我們和Chrissie關係良好，亦有簽下片約。知道GME 正在和Chrissie 開展未來幾年的合作協議中，希望Chrissie和經理人之間的誤會能盡早解決。」
+4