【颱風山竹】孖黎瑞恩上山鋸樹開路　鍾健威：自己香港自己救

颱風山竹雖然已經遠離香港，但10號風球時，蹂躪本港多處地方嘅後遺仍然歷歷在目。多區仍有塌樹令交通大受影響，網上瘋傳一張警員喺缺乏工具下，以簡陋手鋸清理塌樹嘅照片，而黎瑞恩就即刻去購入電鋸，叫埋同門師弟鍾健威，坐言起行到馬鞍山及錦田幫村民清理大大小小倒塌樹木，為居民打通道路。

黎瑞恩尋日留言話：「我要去做德州電鋸狂魔喇！」仲上載一張有2把電鋸嘅相，電鋸非常新淨，原來係佢剛剛購入，叫埋同門師弟鍾健威（Ray）坐言起行，先去馬鞍山，再去錦田幫居民清理山路。Ray留言話：「我地一行三人兩把電鋸同安全帽，上馬鞍山村沿路幫手清理山路什樹，一去到就見到要幫手既情境，唯一既上下山通路俾好幾大棵樹堵塞住，有任何救援需要的話都到不到，我地就同幾個村民邊鋸邊搬，2個幾鐘清開左條路！安全落返山喇。香港被吹至遍體鱗傷，我地就合力執返靚佢！」加上Hashtag「自己香港自己救」，村民都相當感謝佢地出手幫忙，送上新鮮跌落嚟嘅青木瓜作答謝禮物。