【農夫演唱會】堅持零內部認購︰全場1500人都係真金白銀買飛！
昨晚(11月9日)農夫完成首場《農夫十八歲生日快樂演唱會》，成軍十八年，他們在演唱會中向入行生涯以來遇到的5個人致謝，頭2位包括是經理人DJ Tommy以及Do姐鄭裕玲。演唱會中段，他們再向子華神致謝:「黃子華嘅棟篤笑可以說得上係我哋嘅胎教，我哋一路都好鍾意佢，直到我哋有幸去到佢《金盤𠺘口》嘅慶功宴，當時酒過三巡，全部來賓都盡興而歸，正當我哋都諗住走嘅時候，子華就捉住我哋話傾多陣，點知一傾就係六個鐘，足足係佢個騷嘅三倍時間。」隨即唱出新歌《面斥不雅》。
唱首歌收律師信 C君︰勁過LMF
元祖農夫再現，原主音GiGi及DJ Galaxy現身台上，不但即場重新拍攝一張元祖農夫的舊相，更唱出他們的舊作《十七年華》。
農夫亦順道感謝第四個人，舊老闆陳冠希:「有幾隻唔錯嘅碟都係Edison幫我哋做，當中一隻叫《O'FAMA》嘅碟，入面有首歌令到我哋人生第一次亦係唯一一次收到律師信。事緣當時有2個團體都比較多負面新聞，而我哋根據呢啲新聞去寫咗首歌出嚟，最後其中一個團體發律師信要求我哋將呢首歌喺YouTube上面下架，對我哋嚟講都冇乜所謂，因為對方似乎唔清楚fb運作，我哋下咗架，轉頭又會有百幾個人Upload返上去。」隨即唱出《信不信由你》，而到底是什麼團體發律師信給農夫，到最後都沒有揭曉答案，但深信不難在這首歌當中找到答案。
演唱會中段，農夫亦有提及黃牛問題:「通常呢個時間都係要多謝贊助商，不過我哋係冇贊助商。上次演唱會我哋有指定贊助商，所以我哋冇賣飛壓力，贊助商已經幫我哋包咗一啲，不過就好多人話買唔到飛，最後要買黃牛，千幾蚊一張。千幾蚊睇農夫?你點同阿媽交代呀?而我哋作為表演者最嬲嘅係，佢哋唔洗綵排、唔洗做音樂、唔洗做騷，最後賺得仲多過我。」
一輪笑聲過後，他們續道:「所以今次呢個騷，1500個座位，我哋決定全部推出去公開發售，入場嘅每位朋友都係真金白銀買飛入嚟!」取而代之，又是一輪熱烈的掌聲。
真係回水
Encore時段，農夫邊唱《風生水起》邊與觀眾握手，麥玲玲師傅突然現身Feature她的Rap部份，全場樂迷起哄，氣氛去到全晚最高點，其實玲玲師傅正是農夫第五個要多謝的人。玲玲師傅更大派生日利是給二人，農夫即場拆利是，發現利是合共一千元，更即時派給當晚生日的歌迷，可謂「真正回水」。
演唱會散場時，農夫亦繼續去年演唱會傳統，有「迎賓」自然就有「送客」，二人從台上走到出口，逐一與樂迷握手答謝。