馬浚偉憶亡母離開聽《Today》成夢魘:到醫院時媽媽仲未打包

撰文:洪曉璇
出版:更新:

馬浚偉每次見顧美華都情不自禁「媽媽聲」,兩母子嘅緣份,源自馬仔覺得美華姐同佢媽媽氣質相近,誠邀演出自編自導自演舞台劇《生前約死後》飾演母親一角。日前「兩母子」接受香港開電視主播馬梓軒專訪,馬仔仲即場爆料:「美華姐係個搞笑能手!」原來劇中有場爆粗戲,美華姐話:「嗰場戲嘅難度在於,我本身識講粗口但劇情就交代我唔識講,所以好好笑囉!」

馬浚偉顧美華日前接受香港開電視主播馬梓軒專訪。

美華姐雖從未演過舞台劇,但對阿仔嘅要求卻爽快答應:「演舞台劇我把聲係完全唔合格,手腳又僵硬,要重新學習就好似返學上堂,一星期返足5日,有時下午班,有時返夜校!」馬仔就盛讚話:「佢係操行拎滿分嘅同學,日前總彩排時拿出真功夫,當堂嚇壞我地,演技一流,不愧為國際級演員!」

美華姐仲笑言同劇中老公「加埋百幾歲人談浪漫」,完全唔覺得有幾浪漫,但馬仔卻肉緊地堅持話好溫馨。

呢次舞台劇係馬仔憶念亡母之作,佢坦言同美華姐相處落,發覺彼此真係有唔少共同處。馬仔說:「美華姐在兩年間痛失三位親人,而我亦在兩年間,失去媽媽、婆婆,妹妹亦有事,我地傾起生離死別特別感同身受!」馬仔花咗十年時間先走出傷痛,美華姐認同指時間沉澱係最好嘅療藥。

透過舞台劇,馬仔和美華姐希望帶出珍惜和孝順的訊息,馬仔自問絕對是個孝順仔,美華姐亦說父母常誇讚她是孝順女,唯獨她卻一直自責孝順不足。

馬仔以前好怕聽到《Today》這歌,每聽到都會憶起亡母而痛哭不停,但最近卻翻唱此曲。馬仔解釋說:「1999年7月21日深夜,爸爸通知我去醫院見媽媽,我剛開車就聽到《Today》,歌詞太中啦忍不住淚如泉湧,到醫院時媽媽仲未打包,然後處理完後事開車離開時,又聽到呢首歌,後來亦經常會聽到,我心諗:點呀?!唯有捂著耳朵詐聽不到!」相隔近十年馬仔終於衝破心魔翻唱此曲,獻俾一眾有同樣經歷嘅人。