黃偉文喜用IG分享戰利品 「但story令人生太透明」
撰文:李婉文
出版:更新:
黃偉文(Wyman)昨日(20日)出席品牌傢俬展覽活動,他出名愛購物,會在IG分享「每日都買一樣嘢」。他亦坦言如果買傢俬,會怕不夠地方放置,「其實我有個倉嘅,但你知都係會滿嘅,所以買傢俬要特別小心。如果真係買嘅傢俬,應該係真愛嚟㗎喇。」
被問到Wyman用來放置戰利品的倉是不是迷你倉?他說:「唔知你叫唔叫迷你呢,有啲人覺得咁樣係迷你嘅,有啲人覺得咁樣係OK嘅。(會唔會租4、5個倉?)3000零呎啦,對某啲人嚟講可能係迷你嘅,所以我就唔知喇。(一個倉會唔會都唔夠裝?)唔夠個陣先諗啦,日日咁諗住呢,人生就唔快樂㗎啦。我諗總會有一日唔夠嘅,但係暫時仲OK嘅。」
Wyman筆下有不少詞作,他就表示無意像分享購得的物品一樣,每天分享一首代表自己心情的著作,他說:「咁好難每一日都post咁多嘢㗎,其實每一日post一樣買嘅嘢已經好攰㗎啦,所以暫時只係會post買嘅嘢。(可以用IG Story分享?)因人而異,性格問題啦,我有少少覺得story令人生太透明啦,我就無咁鍾意我人生咁透明。」