【入住請敲門】與林婷合體再挑戰撞鬼酒店 莫竣名:今次有新形式

撰文:鄺鈺瑩
出版:更新:
莫竣名同林婷合體主持新一季《入住請敲門》。(影片截圖)

由莫竣名同林婷主持嘅ViuTV節目《入住請敲門》深受觀眾歡迎,由於第一、二季先後去過泰國、馬來西亞等出名猛鬼嘅國家,連莫竣名都擔心已經無嘢好拍,但靈探點同鬼怪嘅嘢真係數極都仲有,所以新一輯《入住》又嚟喇,節目更順應網民嘅要求,安排莫竣名同林婷一齊出擊,並且加入MIRROR成員邱士縉(Stanely)同盧瀚霆(Anson),地點雖然係第一季去過嘅日本同台灣,但據知4位主持人將會走訪台中、嘉義、新竹之後再轉戰日本關西,而集數亦預計由過往嘅10集加碼至15集!

林婷透露同上季一樣,今次拍攝全程都有師博睇實。(資料圖片)

身在台中嘅林婷接返《香港01》訪問時,透露今次拍攝需時一個多月,由於過往同莫竣名都係分開探險,所以難得合體感覺十分新鮮:「今次都係繼續入住唔同嘅酒店,但都會有靈探點,不過觀眾就唔使淨係再睇我同莫竣名嘅睡相,因為多咗Stanely同Anson,哈哈!」集數加碼,問到薪酬是否同樣加碼,林婷就表示「滿意」。而被網友封為「沙膽哥」嘅莫竣名,就表示今次將會以另一種形式探靈,但至於係乜形式,佢就監製未有同佢交代:「唔係唔想講,係我自己都唔知!哈哈!佢哋淨係話而家係拍緊《入住4》,但點解無咗《入住3》?一個謎,不過應該都係gimmick。」

同過往一樣,莫竣名都係無特別準備任何嘢就出發拍攝新一季《入住》。(影片截圖)

節目雖然開拍才一星期,不過林婷前晚開live時就透露已經遇到「怪事」:「有幕係我check房時,突然間有人好大聲嘭一聲拍門,我成個人彈起咗,開頭以為係MCM(莫竣名),點知出房唔見有人,我開頭都唔驚,因為一直都以為係佢,點知到而家佢都否認,所以就開始識驚,又唔係好靈異,係驚嘅經歷。」