【逃犯條例】看警方金鐘武力清場畫面 森美感震撼:開唔到心!

撰文:吳子生
出版:更新:

森美今日(14/6)以「捐血宣傳大使」身份出席由香港電台與香港紅十字會第二年攜手合辦的「熱血港台@世界捐血者日」2019啟動儀式,呼籲大眾一起捐血救人。森美表示:「細個嘅時候喺婆婆度住,見到舅父捐血捐到有個獎勵木牌,後尾先知道呢個牌要捐夠2百次先有,原來先知道佢捐咗咁多血,再加上我出世嘅時候,媽咪大量出血,當時需要輸血先冇事,咁所以呢兩樣嘢令我去捐血嘅原因,因為冇大家嘅捐血,我可能都出唔到世。」

森美呼籲港人記得在7月2日前登記做選民,為香港未來前途出一分力。(劉智源攝)

提到最近香港特區政府就《逃犯條例》修訂引發大規模示威,日前警方在金鐘武力清場,不惜用橡膠子彈及催淚煙等武器驅趕示威者,森美哽咽表示:「畫面係好震撼,最牽動我情緒係我身邊年紀比較大嘅爸爸,佢講返俾我聽佢親歷其境嘅時候,佢嘅眼淚不停咁流,我見到一個大男人幾十歲,比我年仲要大,佢講返當時嘅情景時,喺我面前流眼淚,就更加觸動到我,畫面好多時候俾我睇到係震撼,但真係觸動到我嘅心就係你身邊嘅人嘅情,我覺得香港人最靚嘅地方就係,人與人之間嗰種關懷,佢更講俾我聽,佢在陣壓現場與年青人之間扶持嘅愛,喺我信仰之中愛是很重要。」

森美認為港府有太多可行方法可做,不應強行通過草案修訂,應該聽取民意後才決定。(劉智源攝)

(現在心情平伏啲嗎?)森美傷感直言:「相信與好多香港人一樣傷心同痛心,平伏嘅希望將來會係點,希望可以在和平當中,大家都能爭取到大家想爭取嘅嘢,呢樣嘢都好緊要,好似我哋平時做節目都會好開心,就好似尋日香港嘅聽眾玩唔到,開唔到心,咁我哋就轉咗節目做嘢嘅形式,叫大家將自己嘅歌點俾香港聽啦,聽眾就講佢哋心中嘅說話,我哋就代佢哋讀出心聲,我哋覺得嗰日刻係可以舒緩沉重心情,希望大家能在自己嘅崗位做到最好。」