【全民造星II】Tank同和味隆魔音夾擊 Gin Lee激到變Mean Lee?

撰文:黃浩晉
出版:更新:

正所謂「Dancer唱歌註定坎坷」,昨日播出的《全民造星II》集合了兩大「魔音」——Tank與和味隆,雖然他們舞藝高超,但唱功方面仍有待改善。本集焦點邀請到Gin Lee擔任歌唱導師,面對「魔音雲集」的場面,令Gin Lee都變Mean Lee,片頭說了一句:「都冇準備好,好似玩咁樣!」

昨日播出的《全民造星II》魔音雲集,一路聽綵排一路尷尬笑。(節目截圖)

起初所有參賽者都不知道Gin Lee在場,但其實Gin Lee一直在暗暗觀察,但有些細節實在讓Gin Lee擰晒頭:「唔好向住咪咳……唔好拍咪……好難捱嘅四分鐘……」,就連在旁的花姐都睇到縐晒眉。Tank在唱《到此為止》時,Gin Lee繼續擰頭:「永遠都去唔到嗰個音,一係低(咗)啲、一係低(咗)啲。」但留意返,Gin Lee變Mean Lee不無道理,事關她看得出有些參賽者毫無準備,輕視了唱歌這回事,所以她說:「我睇晒大家嘅排練,有啲人我係好嬲,有幾下feel到浪費緊全部工作人員嘅時間,同埋觀眾點解要打開電視睇未準備好嘅人?」

面對唔認真嘅參賽者,Gin Lee語重深長咁同大家講心態好緊要。(節目截圖)
點擊睇更多精彩畫面!(按圖放大)(節目截圖)
+1

排練期間參賽者「和味隆」更壓力爆煲爆喊,他認為自己在做未準備好的事,但Gin Lee慶幸他有爆發出來,她說:「就算我出道行10年,有時候我都會覺得自己好渣,呢個係一個過程。我唔會叫你唔好喊,但你要知道下一步點做,你可以選擇繼續喊,日日喊,但你唔會進步;定係你知道自己唔夠好,依家有機會去學,令自己進步。」她又提到:「每人嘅堅定同堅強,係嚟自無數次失敗同掙扎!」

兩大魔音同框!(節目截圖)

《01眾樂迷》就昨晚節目問及Gin Lee,到底當時參賽者哪些細節讓她不滿?她表示:「令我最嬲嘅係,唔重視自己每一個機會,作為一個表演者,應該保持一個應有的態度,去令人哋值得關注你自己。」另外,有哪位參賽者「最聽教」,又有邊個「最有慧根」進步好多?她說:「之後我發現佢哋全部都好願意去學,知道自己有不足,全部都好聽教,所以我會同佢哋講好多嘢希望幫到佢哋。Ian、Jeremy水準比較出色。」至於和味隆爆喊,然後她語重深長地鼓勵他,原來是來自身經驗:「我覺得喊唔緊要人總會有情緒,我都會遇過一啲時候自我感覺非常差,係我自己嘅經驗之談。」