【入住請敲門】林婷拍攝中途疑邪氣入侵：師傅開咗一道符水畀我飲
撰文：吳子生
出版：更新：
林婷（Angel）今日（25/11）現身銅鑼灣出席醫學美容新店開幕活動。Angel透露自己皮膚一向容易敏感，所以對於肌膚保養一定做足功夫：「我除咗每晚敷Mask之外，每個月都會做一次Facial，因為呢樣嘢一定要定期去做，始終我哋做呢行經常要化妝關係，其實都有好多污糟嘢喺皮膚度，所以要做一啲深層清潔去清走佢先有用。」
Angel拍靈異節目時，懷疑自己撞邪導致生病。（陳順禎攝）
Angel透露自己有份主持的ViuTV節目《入住請敲門4》將會在12月中啟播，但到拍攝過程有否經歷過靈異事件，Angel直言感受過：「唔知係咪接觸得多咗，都拍攝咗三季，曾經試過拍完之後成個人病咗，成日個頭好重又暈，於是我搵咗位師傅求助，師傅就話我有邪氣入身，於是開咗一道符水畀我飲，飲咗之後即刻成個人冇事醒番晒，所以真係唔到你唔信。」
Angel自認皮膚容易敏感，所以揀選護膚產品時要特別小心。（陳順禎攝）