【後生仔傾吓偈】馮盈盈專揀靚仔 父母教要先同居:咁先知夾唔夾

撰文:鄺鈺瑩
出版:更新:
盈盈話爸爸由細到大都叫佢揀男友一定要靚仔為先。

最新一集《#後生仔傾吓偈》以「自我管理原則」為題,節目中,一眾後生仔寫出自己嘅教育原則,馮盈盈寫下「要有同理心」,並表示呢個係因為受到父母所影響而有嘅諗法。馮盈盈表示:「根據個人經驗,父母永遠都為仔女好,又或者會諗有咩係對你好,例如我爸叫我一定要揀靚仔,因為覺得對一世,但係咁會令小朋友好自我中心,淨係諗到揀個靚仔又有型、啱自己心水,變相無咩諗過點為人付出,同埋唔會識換個角度為對方諗。」

盈盈自認無咩同理心,所以自己嘅教育原則係「要有同理心」。

去年底馮盈盈宣布同拍拖四年嘅醫生男友鍾文浩(Martin)分手,並指出「相見好同住難」。其實之前盈盈都曾在《後生仔》中透露過,曾與男友鬧交後趕對方出門口,而對方亦嬲到用粗口問候佢全家。如今馮盈盈在節目提到「想要有同理心」,絕對係有感而發,節目拍檔陸浩明聞言後,隨即問盈盈「係咪細個好缺乏」,盈盈支吾以對表示「係……」,並謂「咪就係果啲理論,例如同男朋友結婚一定要同居,咁先可以起到晒佢底知道夾唔夾。」唔知盈盈睇返會唔會好感慨呢?