新年目標只是無心付諸實行的藉口

撰文:李聲揚
出版:更新:

真人真事小故事:2000年左右,仲係大學生嘅我發緊作家夢,覺得做專欄作家好有型。
我鼓起最大勇氣,向一個當年幾鍾意嘅專欄作家請教「如何成為專欄作家」。
結果?事隔幾日佢在專欄親自講呢件事,講有位茂里(原文照錄)自己文都冇寫過一篇,就嚟問點樣變專欄作家。呢件事令我傷心咗一排。

立新年目標,for what?(PEXELS)

人大了,重新愛上過節

做完冬話咁快又聖誕,聖誕後話咁快又新年,之後仲有農曆年同情人節。懶過梳乎蛋嘅打工仔(例如返緊工睇博評嘅你),可以一路沉醉在節日氣氛中。

細細個我好鍾意不同嘅節日,到青春期(又冇拖拍)就開始憤世嫉俗變咗牢騷王,「我最憎聖誕節!」。然後到年紀再大啲,又再開始鍾意節日。以上係我嘅歷程,但我估有唔少人同我都一樣。

我而家都幾鍾意新年,特別新年目標呢一部分——因為如果冇2017年目標,我哋邊有藉口將從來都冇實現過嘅2016目標抹走呢!

至於年尾回顧呢部分就比較惡搞,特別係而家有Facebook,硬係會陰魂不散咁提返你1年前講過乜。不過反正只係自己睇到,咁一於扮睇唔到,於是就唔使去減肥,亦唔使睇多啲書,更加唔使向鍾意嘅人表白,或者狠下心腸轉工/分手/打巴你個賤人同事。 

年青人憤世嫉俗,年紀大就重新愛上過節,其實好合理。年青時自覺有用唔完嘅時間,食肥膩嘢有用唔完嘅quota,讀書開工(更多時係玩)通頂後訓返幾個鐘又生龍活虎。而家呢?我就literally變咗舊電池,耗電就快叉電就耐,叉極都唔滿。就算好彩叉滿咗,轉頭話咁快好似倒水咁又冇晒電。

年紀大了,會重新愛上過節。(路透社)

當發現時間不再是無限

人由幾時開始覺得自己唔再年青?有人話係由你開始留意健康資訊開始。但我覺得,更加好嘅量度方法,係睇你幾時開始聽王菲唱《紅豆》會好有共鳴:「有時候,有時候,我會相信一切有盡頭」。

就係某一年,我開始發現,時間唔再係無限嘅,青春唔再係好似樂視或Uber咁可以係不停咁燒。而家我愈嚟愈少試新餐廳,因為如果中伏我會好扯火。錢都其次,最慘係又冇咗一餐quota。當我剩返60年命,一日兩餐,40,000餐飯多啲。扣除最後幾年(或10年幾)插住管或者乜都唔可以食,又扣埋應酬飯呀之類,畀你完全自主嘅,其實都唔係你想像中咁多。真係食一餐少一餐,要學《深夜食堂》個阿伯咁記低每一餐。對,年青人都係食一餐少一餐,但佢哋唔會有呢種自覺。

同樣地,而家睇一本書,睇咗一段時間覺得唔對路嘅,寧願壯士斷臂,唔睇。唔再年青,就係你知道窮你餘生,都冇可能睇得晒你想睇嘅書。好書太多,時間太少。或者根本係慾望無限但資源有限,畀我聽日退休都未必睇得完。

正係因為我某年忽然發現自己不再年青,生命有限——所以,更加唔好再整咩新年目標!無數咁多「外國研究」都話你知,新年目標多數都唔會達成,仲會話你知點解。而我在呢度只問一句,立新年目標,for what?

有人覺得問嚟好多餘,目標咪目標咯,想做嘅嘢嘛,要有夢想要改變世界唔好做樓奴嘛(其實好多係冇錢做樓奴)。但,做咩要係新年目標?Steve Jobs照計唔係新年決定要整部電話改變世界,孫中山照計都唔係新年決定要起義。

有目標就做 何必等新年

新年目標,唔知係整畀邊個睇。好多時我更加覺得係整畀人哋睇,同人哋交差。我要努力向上,不枉諸君寄望。我中一時充滿正能量,第一次學人定咩新年目標。當年Form One仔許下「寸陰愛惜力爭上游」(校歌歌詞幾咁洗腦)嘅宏願,早已在某遊戲機中心入面無人記掛,隨風飄散。後來我只有體重力爭上游,亦都在睇港產爛片時諗做咩成日話自己「冇時間」。

有目標?做啦,更加唔使等新年。講有乜用呢?Talk is cheap。特別係呢個年代人人都要爭住發聲,否則就慘過發腥。做Facebook Page嘅都知,刪人留言等於殺人全家。你可以用最下流嘅粗口鬧返啲留言者,但千萬,千萬,千萬唔可以刪佢留言——否則佢好似貞子咁冤住你。

想做多啲運動?行動最實際。(iStock)

個個都講夢想,太廉價。呢個年代啲人,上網講咗等於做咗,更不堪嗰啲講都慳番,share人哋張圖或段嘢就當自己做咗。講就個個都追夢,事實有幾多個行出第一步?神仙報夢講六合彩冧把你知都要你去買先得嘛。

我回顧自己今年,最值得講嘅係兩件事。第一係搞移民台灣,第二係開始在呢度寫文。原因呀心路歷程等等唔係重點,重點係:唔好講咁多,做!日日講香港已死,一係你改變佢,一係你改變自己心態,一係你走,三選一。但肯定你日日上Facebook講係最冇用嘅。

踏出第一步 先好同我講有幾難

因果報應,而家年中都不少人問我點樣可以變做博評作者,我嘅回應冇當年嗰位專欄作家咁寸,但我多數都係叫當事人整幾篇文嚟睇下——咁就已經九成以上嘅人都冇再搵我。

唔好再定咩2017目標。你唔同意都好,但永遠講就易,做最難。真係有決心嘅,做,唔好講。你在場邊指手劃腳話「唓呢球波畀我都入啦仲話球王」、「你啲文我都識寫啦垃圾」。咁好吖,你咪落場踢兩腳,寫兩篇文。到時你咪知有幾「容易」。

社交網絡興起,大台優勢冇晒,全球化今年好似受挫折但世界依然比以前更和平。日日講追夢嘅,根本冇人可以阻到你,最阻住你嘅係你自己。想出走嘅, 走。想表白嘅,呢幾日就同人講,好彩仲可以一齊倒數跨年。唔妥老細同事覺得埋沒你才華你嚴重underpaid嘅,即時辭工。

「你自打嘴巴啦,你估講咁易咩?」對,到真係做時,自然冇咁易。但到你踏出第一步,先會知自己要乜,或者先知自己肯犧牲啲乜。所有嘅「好難揀」, 都係因為思想實驗唔使真係揀。到大吉利市阿媽同老婆一齊跌落海,你自然揀到。整新年目標你梗係可以又想專心事業又想陪女朋友又想做多啲運動。到你聽日就走去做,你自然就識得取捨。可能最終你發現原來都唔係好愛你女朋友,或者最後覺得大肚腩都冇所謂,或者最後寧願辭工。你生命係你自己嘅,點揀旁人都唔可以輕易話錯,但你唔去揀,就九成三樣嘢你都冇晒。

祝大家新一年坐言起行,買定離手。

(文章純屬作者意見,不代表香港01立場。)