陳淑蘭放貓上車頭 搵貓咪陪揸車：培訓成一隻好狗嘅貓
撰文：何志衡
出版：更新：
陳淑蘭一向好錫小動物，養過多隻貓貓狗狗，不過日前蘭子做咗件事就對貓貓唔係咁好，俾網民鬧喇！
蘭子帶貓出街，將隻貓放咗喺車頭軚盤前面，然後開車，仲將過程拍片放上facebook，蘭子咁寫：「我要將你培訓成一隻好狗嘅貓，第一課：先帶着你出街陪我揸車。」影片見到隻貓伏喺車頭，似乎好緊張咁四處張望，愁眉苦臉，架車停低時貓貓已好似想逃走，當架車再開動，貓貓再似想走，但又有啲驚惶失措唔知點算好。
蘭子揸車帶埋隻貓，話要訓練隻貓好似隻狗咁，好難喎！
貓咪伏喺車頭似乎好驚，四處張望。
網友睇完條片似乎唔多buy蘭子，紛紛留言提醒佢：「咁樣放隻貓係（喺）車頭，小心累人累己」、貓的天性始終同狗差異太大，如果你家貓咪係膽小唔適應出街，會有機會出現應激，將啲潛在重病激發出嚟。」、「嚇親佢啦」等等好擔心貓咪。
蘭子對事件未有回應，不過佢一向都好愛錫小動物，今年６月佢隻愛犬重病需要打針了結生命，就曾令佢傷心崩潰，所以蘭子應該會聽取網民意見，好好照顧貓咪嘅！
網友留言勸陳淑蘭唔好將貓放喺車頭。
蘭子好有愛心，不時同貓咪合照放上網。
幾個月前蘭子愛犬因病去世，她非常傷心。