【百萬富翁】一萬蚊題目敗走　林作賴崔碧珈：情迷意亂搞到唔專心

「係咪最後答案？」淨係講呢句，大家應該都知道係節目《百萬富翁》嘅經典對白。今日在舊亞視廠房為首集《百萬富翁》進行錄影，並邀請了林作、崔碧珈、朱慧敏、王賢誌及何守信做嘉賓。出名讀書勁嘅林作，去到1萬蚊題目就輸咗，「我係輸到「趴街」，問題係關於追女仔嘅，我完全係俾partner崔碧珈分心，情迷意亂之下搞到唔係好專心。」其實識就識，唔識都唔可以賴partner嘅。

林作透露錄影嘅時候有用曬3個錦囊，問佢「打電話」係咪打俾前女友麥明詩？佢笑言，「係打俾一位男性朋友，但佢地都唔識。」而今次首集大贏家就係朱慧敏、王賢誌呢pair喇，總共拎走6萬蚊。朱慧敏話贏到嘅原因係因為同Vinci配合得好，「其實好多時候都係靠佢，我就有不斷溫習啲政治嘢人名呀，但都無咩考到。」但最可惜一定係佢地浪費咗「打電話」嘅錦囊，Vinci話，「我琴日已經打咗俾一個朋友，同佢講今日我會錄影會打比佢，點知打唔通囉！駁咗去留言信箱。」朱慧敏同王賢誌都覺得好可惜，話唔知唔可以再打一次。所以你話呢機會呢家嘢，但好彩Vinci話，「之後錄影完打返俾個朋友，問返條題目佢都唔識，咁我都係光榮引退。」