【有片】林秀怡揸唱k神器開Live 唱《百變小櫻》勁有共鳴
撰文：洪曉璇
出版：更新：
自從無綫推出Big Big Channel，為求力谷除咗每位藝人送上iPhone一部，仲下令藝員上下要「善用」時間於開直播，不論拍劇等埋位還是在服裝間休息都好，都要擠時間做Live，真係聽落都戥班藝人攰呀。不過好處就係多咗藝人隱世絕技被發掘，特別係原來好多演員歌喉都相當唔錯喎，好似鄧佩儀(Gloria)同林秀怡最近都有開LIVE唱歌，唔少網友大讚好聽呀。
鄧佩儀不時開live自彈自唱，無綫咁鍾意捧自家藝人唱主題曲，不妨可以考慮下Gloria。(影片截圖)
華姐入行嘅鄧佩儀之前喺《降魔的番外篇-首部曲》首次擔任女主角，演出亮眼令觀眾留下深刻印象。佢喺Big Big Channel開live自彈自唱，不過就唔係《降魔的》主題曲，而係《On Call 36小時》主題曲《連續劇》。原來佢細細個就參加公開歌唱比賽，仲有七級鋼琴造詣，自彈自唱從容不逼，歌喉仲相當唔錯添。
識唱就緊係揀集體回憶個個識唱嘅歌啦，林秀怡喺車手舞足蹈唱《百變小櫻》，如果打開車窗分分鐘隔離車都一齊合唱。(影片截圖)
而喺《不懂撒嬌的女人》中同Gloria出雙入對嘅林秀怡，就襯坐車時拎支唱k神器出嚟大唱特唱，將車廂變成流動K房，由《到此一遊》、《忘記我自己》唱到《一輩子守候》，不過最正嘅應該係：「百變小櫻魔法神奇誰可阻擋 看我Sakura揮揮魔棒解開嘴咒」，百變小櫻Magic咭主題曲，童年回憶呀﹗識唱嘅快啲一齊唱﹗