【初七人日】周星馳激罕教煮餸　睇佢整「七菜羮」有今生冇來世

今日是農曆年初七「人日」，在中國傳統上屬於人類的壽辰，人人都生日，咁初七呢日又要食咩慶祝應下節呢？TVB Facebook就上載了一條33年前的《430穿梭機》片段，講幾位主持人包括周星馳 (星爺) 、譚玉瑛、龍炳基以及曾華倩在討論初七人日要食咩，又一齊食生日蛋糕。片中的他們個個都非常之後生，當時的星爺只得23歲，是名符其實的小鮮肉嚟㗎。

星爺仲教大家於初七炮製一款名為七菜羮的菜式，話可以消滯，新年食咁多賀年美食，趁人日呢日食清淡些讓腸胃休息下。他講出有邊七種蔬菜：波菜、生菜、芥蘭、筍片、蘿蔔、荷蘭豆，講到最後一種時諗了一會先記得是芹菜，講到眉飛色舞的他更噴到譚玉瑛姐姐一面口水。最後星爺教大家將呢七種菜大兜亂就搞掂，難得他咁認真教煮餸，今時今日真係冇乜可能再見啦。