鄧以婷酒店PO相晒長腿 朱智賢留言話似「準備開工」:大家諗多咗

撰文:李妍樺
出版:更新:

講起鄧以婷大家未必知佢係邊個,但有睇《3日2夜》嘅朋友肯定知佢係邊位,佢真係呢個旅遊節目嘅主持,出咗名係挑戰大台禁色令嘅極限,佢嘅泳衣比堅尼水著照真係令人難以忘懷,絕對係大台不可多人材,34C驕人嘅上圍令佢無時無刻成為大眾嘅焦點。

鄧以婷著三點式做live吸引網民。

鄧以婷私底下喺IG都好鍾意派福利,成日都見到佢PO性感相,露腿騷背係家常便飯,有咁好嘅身材當然要同粉絲們分享啦。前排鄧以婷就喺IG分享咗張酒店房嘅相,Caption寫:「人通常會因為外表而判斷或被判斷,這些只是眼睛給的感覺,面對錯誤的被判斷會很無奈但不要難過,因為用心了解你的人已經在你身邊。」本來就係好心靈雞湯,叫大家唔好淨係齋睇外表,要了解埋個內心。

但就因為同為大台藝人嘅朱智賢一句,成個畫風就變晒,朱智賢留言話:「呢張相好似準備開工咁lol」,網民就諗埋晒啲衰嘢,話酒店開工,仲唔係……大家真係諗太多,其實藝人好多時做嘢,好似拍劇阿、出活動,或者做專訪都會喺酒店房度嘅,係一件好平常嘅事嚟啫。

朱智賢喺鄧以婷IG留言成為網絡熱話。(網上圖片)

事後就搵到朱智賢問問,唔通佢真係同鄧以婷不和到出面,要喺IG度留言暗寸?朱智賢都嚇咗嚇,唔知原來網友摩擦力咁強:「我真係唔知連登好多人討論,好突然,無諗過一個留言引嚟咁多人留意,講真,如果真係不和都唔會兜口兜面咁留言,其實同佢本身都識 又有common friends, 所以大家諗多咗了。」不過朱智賢都怕大家誤會搞到鄧以婷有hard feeling,所以佢私底下都同對方道歉,希望大家唔好再誤會佢哋喇。