【VR驅魔人.專訪】錢小豪最難搵? 王貽興劉翁講做導演背後秘辛

撰文:陳栢宇
出版:更新:

ViuTV新劇《VR驅魔人》之所以有N咁多個串星,係因為身兼導演編劇演員嘅王貽興同劉翁(Sunny)出盡九牛二虎之力,以誠意氹氹下、就就下,一個一個咁搵返嚟。到底邊個係最難搵?兩位幾乎諗都唔使諗,好快就講到個名出嚟——「錢小豪」。

王貽興同劉翁都話錢小豪係最難搵。(陳順禎攝)
+5

錢小豪喺劇集裡面係飾演一個演員,拍咗殭屍片好多年,拍到個人麻木哂。同老婆分開咗後,個仔冇跟佢十幾年,依家好想做返個好爸爸。咁熟嘅?係咪講緊佢自己?Sunny就話本身小豪可大把錢,完全唔需要畀你兩個新導演任舞:「但呢套劇能夠畀佢釋懷,畀佢講返個真實情感,所以佢至肯應承。」

佢哋希望小豪哥透過演出解開佢自己十幾年嚟都覺得自己做唔到好爸爸嘅鬱結。
+9

Sunny繼續說:「佢有啲對白係講緊自己咁,『你細細個時我就喺片場,冇得同你踢波、打拳、溝女』,聽得出佢現實都好渴望咁。」貽興更話現場睇呢幕係睇到喊咗出嚟,他又話其實點解咁多演員,例如余慕蓮、吳麗珠等肯參與,係因為呢度佢哋可以搵到份尊重:「唔會要佢哋等埋位等足十幾個鐘,亦有專車接送。」

王貽興話其實演員最想係要一份尊重。(陳順禎攝)

雖然遇到好多好幫手嘅夥伴,但開拍之前一日幾乎成個Project胎死腹中,Sunny說:「一套劇裡面牽涉嘅人係講緊二、三十人,而二、三十人裡面係咪個個都係精英,可能未必係,可能有啲人拍之前就口響響,嚟到覺得辛苦就成日閃咗去,到我哋提佢唔可以咁時,唔可以成個月先出現一次,跟住佢就發難啦。」Sunny指這個害群之馬周圍唱他們未開拍便已經用哂啲錢,催經理人盡快收埋尾期,出盡方法令你開唔到工:「我哋好多謝佢,因為佢嘅冇責任心,佢嘅懶,而令到我哋知咩人係可以用,咩人係只不過係得三秒鐘嘅熱情。」

劉翁話劇組裡面有害群之馬,搞到成個Project幾乎開拍前胎死腹中,但好在因為呢個人嘅出現,之後個團隊變得實淨。(陳順禎攝)