林峯傳有新歡吳千語亦ready:緣份嘅嘢好難講

林峯同吳千語5年情結束，有傳男方已有新歡，有傳女方因戀上富二代而搞到分手，咁多有傳，咁到底係點呢？宣布甩拖後，千語BB首次出席活動，精神看起來不錯，而且未有像林峯一樣暴瘦。「其實都一段時間，多謝大家關心。」吳千語表示與林峯達成共識，由他宣布分手，但有關分手原因，吳千語表示唔想再講太多，而對於林峯與新歡同遊海洋公園，吳千語表示有看到相關報導。「人哋嘅嘢我唔代答啦。」雖然吳千語話「暫時想一個人」、「依家未ready拍拖」，但她直言「緣份嘅嘢好難講」，看來對感情事留有大量空間。

與林峯熱戀時，吳千語不時被影到shopping 、shopping 同旅行，如今回復單身，會否想在事業上好好一拼？吳千語認為藝人很多時候都在等待，而她從來都是「有好劇本，工作都會去做。去年拍咗內地劇集，係一個幾重要的角色，幾大挑戰，日日都要拍。」吳千語表示過去十分抗拒到內地拍劇，但經過今次拍攝，她又覺得自己可以。「過程學到好多，也認識了很多人，今次算係有主要角色的作品，係個幾特別的經驗。」

另外，提到宣布分手後當晚，去咗睇周杰倫演唱會，最後更被點名唱《彩虹》，千語BB話其實當晚想秘密入場，但結果被安排唱歌，自認歌喉麻麻的她其實有少少尷尬。「不過我真係佢fans、中小學佢日聽佢嘅歌，大家以為我專登揀《彩虹》唱，唔係囉，佢首首都係情歌，如果有得揀，我會想唱《蒲公英的約定》。」同樣都係情歌一首，當中提到的「而我已經分不清 妳是友情 還是錯過的愛情」對千語BB是否有特別意思呢？怕且只有佢自己先知。