媽媽上網分享抱B趁墟掃廚具惹公憤 陳琪都覺唔妥：嗰度好多人！
撰文：陳栢宇
出版：更新：
對好多女士嚟講，呢幾日可能係好緊要嘅日子，因為有一個法國廚具名牌喺銅鑼灣度開倉，有成幾百款廚具任你揀。有網友就係社交網站嘅群組裡面，轉貼一個媽媽抱住BB去掃貨嘅分享，而呢位媽媽就話自己好唔好意思，因為自己個BB肚餓所以嘈到同場嘅人，好彩工作人員都好好安排個地方畀BB開餐，仲講笑話下次會扑暈自己個BB自入場。
法國廚具最近開倉，陳琪都有去掃貨。
分享嘅網友就覺得呢位媽媽「腦殘」，話佢竟然覺得個仔肚餓都唔及啲煲重要，另一位網友亦都唔係好同意呢位媽媽嘅做法，唔明帶住個咁細嘅小朋友去啲充滿鐵同石頭嘅地方係咩心態。都有唔少人留言討論件事，其中一位網友就話其實會場好逼，多貨又多人，帶埋小朋友去好危險；亦有人持相反睇法，佢個留言就咁嘅：「湊小朋友就唔通唔出街，淨係喺屋企咩？」
最近轉型做親子KOL嘅陳琪接受《香港01》訪問時就話自己都有去開倉：「同兩個朋友去，淨係買咗啲碟咁，其實啲嘢都比較重，唔算買得多，怕整親腰骨，得不償失。」至於點睇有媽媽抱住BB去，佢就話冇親眼見到呢啲情況：「嗰度好多人，小朋友同老人家都唔太適合去。都有見到大肚婆，但佢哋都有老公陪住幫手拎嘢。」有兩女一子嘅佢又話如果要湊1歲仔仔Jayden時，就一定唔會去：「不過可能佢哋帶咗工人姐姐，其他人冇留意到啫。」
網上曬戰利品嘅陳琪就覺得小朋友同老人家都唔應該去呢啲人逼地方。