《踩過界》揚威國際奪獎　單立文替演員發聲：好多已經到達臨界點

單立文 (豹哥) 有份演出的無綫劇集《踩過界》獲得「2018紐約國際電視電影節」「最佳劇本組別銅獎」，而該劇的片頭設計就獲得「娛樂節目片頭組別銅獎」，豹哥亦有份做代表出席祝捷會。當其他人都是講得獎感受以及致謝詞時，豹哥講感言時卻提到製作過程相當辛酸，只簡單一句表示：「要含住泡眼淚仲要鼓勵其他同事去完成，希望製作方面會改善。」當住一眾高層包括無綫副總經理 (節目及製作) 的杜之克面前，敢於為所有演員發聲，亦揭示了無綫揚威國際背後其實是血汗工廠。

而杜之克上台作總結時亦特地回應了豹哥的一番話，說會聽取豹哥的意見。杜之克也坦言在TVB無論演員或其他製作岡位工作都需要承受巨大壓力，他比喻為：「就好似要你哋接住天上跌落嚟嘅雞蛋，而啲雞蛋係好似落雨咁。」聽他咁講，已經明白了根本就是Mission impossible，要完成係係極唔容易。

豹哥接受訪問時坦言在拍戲劇期間相當辛苦：「啲對白好複雜，拍攝時間好緊迫，演員又唔夠休息，仲要演啲咁高要求嘅戲，要承受住高壓去演好戲。演戲係需要能量，但演員根本recover唔到，好多都已經到達臨界點。我見佢哋好多都會怪自已做得唔好，會懲罰自己，例如掌摑自己，見到我都好心痛。我都會怪自己做得唔夠好，覺得明明可以再做得好啲，會好唔甘心。奈何喺體力同精神不支嘅情況下，演員又點有可能可以發揮得最好？」豹哥直言演員唔夠瞓是很難繼續捱落去的，希望公司在製作上可以改善下：「好多演員都捱病，其實如果可以每日畀我哋有6個鐘瞓覺，已經好好。」

提到他多年前演出的舊作《刑事偵緝檔案》最近再度重播，原來豹哥都有睇返，對於自己以前的演出，他說：「我覺得好呀，以前演得簡單直接啲，依家人大咗經驗多咗，好多嘢都會深思熟慮，諗太多反而唔好。以前啲演員嘅演出生活化啲，依家太過注重對白，我都覺得以前啲劇好睇啲。」