【復仇者聯盟3】新世界玩遊戲送首映飛出錯 急送電影禮券補數

撰文:關穎賢
出版:更新:
《復仇者聯盟3無限之戰》劇照
參加會員砲轟新世界犯低級錯誤 (網上截圖)

萬眾期待嘅「復仇者聯盟3:無限之戰」終於上映,唔少人都爭住買飛。而新世界New World Club早前就喺Facebook搞推廣活動,叫會員share post留言講低理想中嘅智能家居,被挑選嘅會員就有機會獲得「復仇者聯盟3:無限之戰」首映戲飛兩張。噚晚有好多參加會員都收到確認電郵,仲急不及待約朋友睇戲,但今朝就收到新世界New World Club嘅通知話由於系統錯誤,原本收到嘅中獎通知係誤發,仲叫大家唔需要理會嗰個email,令參加會員空歡喜一場。

然後,大批參加會員都喺新世界New World Club嘅Facebook留言表達不滿,不過新世界New World Club都反應迅速,據知為咗補償大家,將會向每位受影響嘅會員送一張價值135元嘅The Grand Cinema(Elements商場)電影禮券,並會檢討流程,避免相同事件發生。補飛真係最緊要快手!對於這件事New World Club有以下回應:「對於今次事件對部分會員造成不便,New World Club深感抱歉,我們已即時作出跟進,並向所有受影響的會員送出免費電影禮券。由於事件涉及外聘公司發出電郵的程序有誤,New World Club會認真檢討相關流程,避免同類事件再次發生。」