糖妹積極籌備個人大碟　七月音樂劇演出反串十歲男仔

糖妹黃山怡今日出席《逆緣》宣傳活動，在劇中和陳山聰扮演情侶的她下了不少功夫，令原本看似不相干的兩個人都擦出不少火花，令一眾網民都對他們讚賞有加。雖然糖妹在劇中被山聰辣手摧花，但她表示自己並非高產的演員，連續做的幾個角色都可以被觀眾記住，糖妹也直言自己好幸運，好多謝大家的支持。而在昨晚播出的劇集中，原本以為山聰會將糖妹分屍，幸好糖妹臨尾出現，令觀眾都暫時鬆了一口氣。有網友就笑指出現的是糖妹「祖先」，即係另一個冷凍人，搞到糖妹都哭笑不得，佩服網友有想法。

【逆緣】陳山聰辣手摧殘糖妹　賈綽真心愛Macy：為批金衝昏頭腦

除了拍劇，大家都好關心糖妹的音樂事業，她透露現在都有keep住錄新歌，而且有好多作曲要趕著交貨，所以都好忙碌。今次的新歌主要講成長，一半以上都由她自己創作，糖妹直言每一個階段會有不同的看法，而且自己都未出過大碟，所以都會花好多心思去製作：「大家可能見到我不停有唱歌嘅表演，有去出single，但其實我以我自己嘅名義，即係黃山怡呢個名，我係冇出過大碟嘅，所以今次我想完整啲囉，冇凈係話又出single，我都想傳遞出嚟完整啲嘅概念，即係見到另外一面嘅黃山怡，唔凈只係喺電視上面見到嘅一個形象囉。」

嚟緊七月，糖妹就會有一個同「香港中樂團」合作的幾米音樂劇，這個音樂劇的製作團隊在台灣，所以自己經常都要兩邊飛。雖然這次的音樂劇全程都要講國語，不過這對於糖妹來講就so easy啦，反而她在音樂劇中的角色先是最大挑戰：「演嘅角色係一個10歲嘅男仔嚟嘅，所以變咗無論係造型上、身材上，點樣講嘢，行為動作似返一個男仔呢，搞到我而家喺街度都昅啲小朋友。」但是現實中的小朋友和插畫故事裡的小朋友又有些不同，所以糖妹現在都會專登搭地鐵去觀察小朋友，揣摩怎樣去演繹這個角色。儘管糖妹已經年過30，但都依然童顏，唱歌就更不在話下，演得又唱得，相信這個音樂劇都難她不倒啦。