【飛虎之潛行極戰】陳山聰做臥底慘死 同張兆輝兄弟情最感人
撰文：關穎賢
出版：更新：
《飛虎之潛行極戰》播出第三集，第一個臥底陳山聰喺第二集出現咗，唔單止被飾演變態恐怖份子嘅梁烈唯發現咗臥底身分，仲被進行酷刑折磨到半死，好彩由飛虎隊救返，送咗入院。而飾演飛虎教官嘅張兆輝同陳山聰係多年嚟嘅好兄弟，起初以為山聰變咗節，但發生呢件事之後先知道山聰係臥底，仲因為咁覺得怪錯山聰而內疚。本來以為山聰救得返啦，點知梁烈唯點都唔肯放過山聰，趁佢留院期間，假扮醫生潛入病房將氣喉切斷，最後山聰都係逃唔過死劫。
山聰被飾演變態恐怖份子嘅梁烈唯發現咗臥底身分，仲被進行酷刑，被鐵鏈吊起折磨到半死。
除咗睇劇情，值得留意嘅就係陳山聰嘅演技。山聰多數都做開邪邪地嘅角色，就好似《同盟》咁，但今次喺《飛虎》入面就做臥底，因為唔透露得自己身分嘅關係，連個仔同兄弟都憎埋自己，最後仲慘死收場。
談到今次喺《飛虎》入面嘅演出雖然只得兩集戲份，但相當有發揮。講到被鐵鏈吊起嗰場戲，山聰接受《香港01》訪問時，表示都幾辛苦：「最辛苦就係好熱，同埋最主要係我畏高，因為拍嘅時候下面係空心，不過都好快拍完。」至於提到點解得兩集戲份都肯接，山聰指當時樂小姐籌備嘅時候有意思搵自己演出，但因為冇檔期，笑言：「小姐叫到做死屍都做，不過雖然得兩集都好有發揮，今次第一次同輝哥﹝張兆輝﹞合作，但睇劇本嗰時已經好有感覺，同輝哥私底下都有傾偈，所以好快就入到戲。加上角色上同輝哥同三哥都有關連，又係第一個臥底畀唯唯殺死，所以都OK。」