【父親節】錢小豪做湊仔公陪15歲細仔賽車 望子成龍做機師
撰文：冼燕珊
出版：更新：
錢小豪話為咗陪兩個仔所以要停工一排做湊仔公。（葉志明攝）
成日為拍戲而中港兩邊走嘅錢小豪，今日喺香港出席活動，佢話嚟緊要停一停工，因為想暑假陪吓兩個仔，盡父親嘅責任。
廿四孝爸爸錢小豪，話呢排主力陪細仔錢穎德去玩賽車，「我下個禮拜會陪佢去珠海試新車同賽車，上個禮拜就同佢去咗澳門，睇佢啲朋友實車，都係做返湊仔公囉。」他續說:「 本來今次想叫埋大仔（龐景峰）嚟嘅，但佢就要去上海拍戲，咁就冇辦法啦，等佢返嚟再一家團聚囉。」
小豪陪細仔周圍去玩賽車。（葉志明攝）
錢小豪係動作演員出身，功夫了得，不過兩個仔就冇跟隨佢嘅衣缽，不過佢對阿仔都有其他嘅期望，「 阿仔下年就十六歲，我希望佢除咗賽車可以學埋揸飛機，因為喺澳洲16歲就可以考牌，而且揸飛機喺澳洲都好普及，好似揸車咁普及，如果佢第時真係做到民航機師，咁我作為daddy都覺得威吖。」
小豪希望細仔學埋揸飛機，將來可以做機師。（葉志明攝）