【世界盃】阿根廷輸波16強止步　死忠杜汶澤輸身家：要暫停出糧

俄羅斯世界盃正式進入16強賽事，首兩場阿根廷對法國，以及葡萄牙對烏拉圭已經劇力萬鈞，最終兩位球王C朗及美斯都無法力挽狂瀾，齊齊16強出局搭飛機走人，C朗同美斯固然難掩失望之情，忠實球迷亦相當傷心。杜汶澤原來一直係阿根廷粉絲，呢場16強賽事一個決定，應該令佢一世難忘啦。

阿澤喺賽前貼上12年前舊照，相片中肥肥白白嘅佢著上阿根廷波衫，留言話：「你睇呢張2006年舊照，就知我咩（支持邊隊）啦！我仲記得當年做有線電視世界杯主持，響九展有個靚媽媽著住英格蘭球衣，拖住個四歳左右嘅細路女，佢好嬲咁同個女講：「認住呢個忍呀！壞人嚟咖！」之後仲怒啤我一嘢先走。個細路女今年應該有十六歲喇......」

仲會記得八六年阿根廷國家足球隊，仲著緊LeCoqSportif而唔係Adidas，就知阿澤有幾Die Hard。明明人在新加坡阿澤都有keep住睇波，唔止睇仲有賭。踢到凌晨12點完場後，阿澤就喺自己公司facebook page留言話：「作為八十年代過氣嘅阿根廷迷，自從馬勒當拿退役之後已經放棄咗足球嘅杜生，今日飲大咗，將成副身家（即係今個月公司所有伙計嘅人工）買咗阿根廷贏。」

小賭就話怡情啫，玩到賭身家咁大件事，仲話：「本公司宣報暫停出糧直到另行通知。」有網友提醒阿澤唔出糧屬犯法行為，不過之後見到佢上載一張托頭看似苦惱嘅相，show出手錶成張廣告照咁，瞓醒又再去開懷大吃，輸身家應該只係講下笑啫。