敖嘉年約滿後與TVB依然保持良好關係 北上發展後大開眼界
撰文：賴家杰
出版：更新：
多日不見嘅敖嘉年與Tvb不再續約後便北上發展搵人仔，而今日都特意回港支持朋友潛水品牌開幕，但講開呢一段日子香港都唔見佢蹤影，係咪掛住搵人仔呢？嘉年就話其實最近忙近拍《葉問4》，「啱啱先拍完番嚟香港幾日，然後又要飛去英國拍外景，起碼要8月先能夠完成。」不過呢一套聽名就知道係一套動作電影，嘉年拍攝期間有冇受傷，嘉年話由於拍咗好耐，有冇受傷都已經唔記得了，記憶中好似冇。
敖嘉年北上發展後令佢大開眼界。（黃國立攝）
講番與Tvb完約後成為自由身，問到係咪好自由？嘉年表示宜家好多事情都可以處理得到，而佢自己都與Tvb保持一個良好關係，始終佢自己都喺Tvb出身，「我應該年尾會番公司拍一套劇，始終喺到長大，公司有時候會叫我番去，咁如果時間遷就到就可以。」至於會唔會再簽長約方面，嘉年就表示Who knows，一切隨緣。
敖嘉年與Tvb完約一直也保持良好關係。（黃國立攝）
搵人仔相信每一位藝人都會好開心，嘉年就覺得其實番工冇話邊到有好舒服，份份工都有辛苦之處。但問到北上後要適應環境，有邊件事令佢最唔適應？嘉年先回答北上發展簡直大開眼界，「宜家上面工作好先進，環境舒服真係好方便，器材及生活方面都好好，至於要適應嘅係佢哋嘅語言同文化，因為有時候佢哋講嘅你聽到但唔明意思，所以要慢慢習慣。」