【董事廚房】敖嘉年相隔8年再夥拍甄子丹：每句對白佢都執得好正
撰文：吳子生
出版：更新：
敖嘉年今日出席《董事廚房》飯局做客席嘉賓，品嚐由大廚烹煮多樣餸菜，大飽口福，「其實我今日來到喺同大家聚吓傾吓偈，大廚唔知我本身食素已經好幾年，所以呢餐食唔到，好在𡃁妹（李綺雯）帶咗佢專營嘅產品米餅來，我先唔使捱肚餓。」
敖嘉年三年前已經改變飲食習慣，以素食為主。（陳順禎攝）
敖嘉年近年北上搵人仔，剛剛拍完電影《葉問4》從英國返港，緊接10月又拍無綫新劇集，仲要係打到飛起，工作一浪接一浪！「啱啱今年3月去咗上海拍咗幾個月，之後7月去咗英國拍咗一個月啱啱返嚟冇耐，拍咗差不多大半年都唔覺太辛苦，畢竟我喺TVB訓練出嚟，捱慣咗，到我拍呢套戲相對係舒服，因為佢哋安排啲時間都好舒適。」嘉年又話：「10月套劇仲未收到劇本，只知以拍打戲為主，所以呢段時間要操返個體能再裝備一下。」
敖嘉年以部頭合約形式同TVB合作至2019年。（陳順禎攝）
敖嘉年繼《葉問2》後相隔8年，再度與甄子丹合作《葉問4》。「Donnie其實好好人，係一個好嘅前輩，今次我唔係學習佢功夫個方面嘅嘢，而係學習佢演戲方面嘅嘢，每一個細緻嘅對白，佢都執得好正，點解要多講多一粒字，我喺側邊聽又喺喎，佢會同導演商量溝通，我就好似小朋友喺度聽，喺度消化。」