黎瑞恩被美國保安質疑未成年 難掩少女心即興奮尖叫攬對方

撰文:黃欣華
出版:更新:

45歲的黎瑞恩〈小恩子〉日前去到美國洛杉機及內華達州的Reno〈雷諾〉兩站演唱。相隔二十多年沒有到美國演出,除了兩場全爆滿外,歌迷反應十分熱情高漲,大家更衝破現場保安防線,衝到台前要求同小恩子握手,一向親民的小恩子亦有求必應,一路唱,一路走到台邊逐一握手。 當中,在最後一場Reno的Peppermill賭場劇院演出後,大會安排在酒店內的酒廊慶功,期間發生了一件趣事。

話說小恩子入場時,被門口保安攔截要求她出示身份證檢查年齡,已為一女一子之母的小恩子畀人以為未夠秤查身份證喎,小恩子興奮得即時飛撲攬著外籍保安,反問對方:「你真係查我身份證?」對方一臉嚴肅回答:「係!唔夠21歲係唔可以入場。」小恩子隨即告訴對方:「我已經45歲啦!」保安們即驚訝得雙眼幾乎跌落地表示難以置信,隨即核對小恩子的證件,驚愕說唔敢相信,大讚小恩子好靚女。小恩子笑到𠺝𠺝聲:「估唔到廿幾年後仲畀保安查身份證,哈哈!」演出期間,小恩子有三日假期並順道四處遊玩,包括:荷里活大道、環球片場等。