江美儀親證同吳君祥已分手兩年　Ready好迎接新戀情：我available

江美儀與吳君如胞弟吳君祥自2005年拍拖至今，一直都好恩愛，且不時會公開放閃，而外界亦好關心兩人甚麼時候會拉埋天窗。不過至近呢一、兩年，美儀已好少再公開談及男友，加上吳君祥經常要留在大陸工作，兩人被傳因聚少離多而導致分手的消息不徑而走，唯兩位當事人都無正面交代過分手傳聞是否屬實。到了昨日（10月5日）美儀卻於訪問時，首度開腔承認與吳君祥已於兩年前分了手，結束了這段11年的感情。

美儀表示﹕「分咗大概兩年，緣份吧，但我哋仲係好朋友，有保持聯絡，我同佢屋企人都仍然保持良好關係。」對於有報道指吳君祥「偷食」成了兩人分手的主因，美儀就否認有關傳聞話：「唔係，我哋無第三者介入。」更強調舊愛絕非衰人，分手原因是兩人近年聚少離多，步伐不一致。她又謂之前不公開分訊是怕會有負面新聞影響到舊愛和家人。她透露自己回復單身後仍未有追求者，笑言：「希望從今日起開始有。」

不過，當美儀親口承認同吳君祥分手的消息一出，竟然有人驚爆出原來兩人早已結了婚，即是由分手變離婚！有報道指吳君祥的爸爸夏春秋（冬叔）爆料，表示美儀與吳君祥於2006年已在西雅圖註冊結婚，他自己也是於一、兩個月前才知道仔仔同新抱分手，向來好錫美儀的他更大嘆好可惜，又大讚美儀好好，好有他心。

而美儀接受《香港01》的訪問時就表示：「我同君祥無結過婚呀，係冬叔搞錯咗，佢記錯咗喇！嗰年我哋去西雅圖探我爹哋媽咪，咁君祥講嘢又成日唔正經嘅，講咗句『我哋去度蜜月呀』，可能冬叔當時就記住咗佢呢句說話，一直就以為我哋結咗婚囉！（佢咁錫你當正你係新抱仔？）其實都係，我都跟君祥嗌佢Daddy，大家已經係一家人咁樣，依家過時過節食飯慶祝，佢哋都一樣會叫埋我。」

美儀直言雖然覺得結束11年感情好可惜，但緣盡了也沒有辦法，暫時沒有復合的可能。她亦已經ready好迎接新戀情：「我依家available㗎喇！」

一齊睇下美儀啲靚相先！