【兒嬉立法會．專訪】葛民輝搞夏令營撐開電視：唔想一星期拍一集
葛民輝總是令人喜出望外。本身是櫥窗設計師、沒有標準靚聲的他，當初也沒有想過自己能夠靠支咪、靠把口便搵到兩餐晏仔，因為去到80年代末，每個電台DJ講每粒字都清清楚楚，句句都沉穩有力，不似他的聲音那麼有標誌性。當他之後成為了歌手、演員和電影導演，再做埋潮人出自家品牌，又開過網台3by8.com，幾乎所有媒介都玩勻晒，當大家正期待他的下一步時，卻失驚無神傳出他反其道而行的消息，在普遍人認為香港電視媒體愈做愈霉、每個人都衝出框框到網上世界的時候，重返電視圈之餘更包辦了一個電視節目，做一個電視製作人，繼續實行他與長年拍檔林海峰的座右銘——「人做我唔做，殺出條血路」。
兒嬉立法會不兒戲 討論具爭議性兒童話題
由葛民輝兼任節目主持人的《兒嬉立法會》將於10月27日（星期六）晚上10點鐘至10點半在香港開電視（前名奇妙電視）首播，在一連15集的節目中他與數名小朋友穿上特製的「公仔衫」，分別化身成主席和議員，在各項關乎兒童權益以至社會民生的議題上針鋒相對，而議題亦充滿爭議性，包括：「爸媽可加可減機制」方案、「16歲以下學童禁止使用手機」草案、「學生拍拖法定資格」、「刪減哥哥姊姊持權法」、「家規修訂議案」、「兒童禁止一人一房」草案、「小童借貸計劃」議案以及「粗口刑事化法例」草案等，一班家長更會在場見證子女的言論如何出人意表。
是否弱台播不重要 最緊要有Idea
雖然奇妙電視從未真正公布過收視，但作為觀眾的大家不難感覺到這間電視台收視比起TVB低了一大截，甚至仍然有人未能接收到信號，說是「冇人睇嘅弱台」也絕不為過，但葛民輝卻偏向虎山行，在這個即將改名成香港開電視的電視台裏面，瞓身搞節目兼粉墨登場，他接受訪問時便指拍攝一個電視節目，該平台是有否人睇，以至是否有足夠資金、是否有經驗豐富的班底，從來都不是先決條件，最重要的始終是「想法」、「意念」：「有諗法、有意思嘅，咪去幫佢做囉，唔係一定要去一個好高收視嘅頻道做，係要睇佢個價值，值得去做就要去做。」
值得做是一件事，做得好卻是另一件事，這次孭起電視節目製作的葛民輝絕對可以說是盡做，所有環節比最好更好，好難想像出一套親子節目，能夠達致如此高度。暑假甫開始，葛民輝便透過面試，由60幾70名小朋友中篩出7名「被選中的細路」，而其中一個條件是他們的父母能夠在暑假中抽出4日，每天參與拍攝8小時，將整個製作變成一個親子夏令營：「其實初初個諗法係嚟自電視台本身，即係王喜，佢覺得做一個小朋友嘅立法會都幾好，諗邊個做主持時就諗起我。我同佢傾傾下就發現問題大喇，除咗製作費，仲要諗啲小朋友夠唔夠立體，我就話你唔介意就畀我試下。」
半日已變小魔怪 騎劫整個立法會
特意挑選油塘表演勝地This Town Needs拍攝的葛民輝，為了令小朋友和家長有賓至如歸的感覺，拍攝時間、接送安排、休息地方、食物供應都度身訂造做足一百分：「唔係當佢哋係臨時演員，『喂，到你埋位喇』咁樣。我哋係想喺呢個餅底之上，見到佢哋係連戲，了解佢哋個價值觀邊度嚟，睇下佢哋呢4日會唔會有成長。初初我以為第2日班細蚊仔先會變得多嘢講，大約第6集先會熟絡，點知半日已經變晒，成個立法會都俾佢哋騎劫咗，識得點樣玩拉倒、圍票同私底下通話，反啅返我哋嘅議題。」他笑言度問題的「秘書處」完全低估小朋友的能力，經常極速被K.O.：「講手機問題時，畀佢哋只可以揀一個功能，佢揀打機，我話『咁唔可以講電話喇喎』，佢話『唓，有咩所謂，咪用電腦Facetime囉』，勁容易俾人跳過咗件事。」
不是鋤強扶弱 不是誰人都幫
重返電視節目製作的葛民輝，其實之前已不時在電視中亮相，更曾經與林海峰包辦了超級經典的《軟硬製造》（1993），到近年他便開始到ViuTV演出，參與《瑪嘉烈與大衛系列 – 綠豆》和《VR驅魔人》拍攝，愈拍便愈有特意去鋤強扶弱的味道，但葛民輝卻說：「關咩事！係睇嗰個人、嗰件事有冇心去做，喺邊度播其實冇咩相干，你拍咗一段片，如果真係值得睇，點樣都會有挖返出嚟睇。好多朋友諗住做導演，我話我做過喎，好辛苦，做嚟做乜，但佢都係好想做，咁如果佢真係好有心，我都會幫得就幫，大家都臭味相投喎！其實又唔可以話我去幫人嘅，可能係佢哋幫緊我，畀啲機會我演出。」
葛民輝又指自己不是見人就幫，總有一些情況他會斷然拒絕：「第一係就唔到時間啦，第二係我睇唔到個原因，望唔到你團火係乜，有時又唔係淨係要你有團火就夠，都要有條橋喺度。」
會繼續玩轉電視 希望觀眾開電視
正所謂做開有條路，葛民輝不排除之後都有機會參與電視節目製作，當天時、地利、人和齊集，他便自自然然會埋位：「我之前成日笑自己失業，係因為呢個世界好似冇一樣嘢值得瞓身去做，做一件事一定要有原因，一係為錢、一係為橋、一係為過癮，你拍個節目，先決因素係有冇錢畀你製作，而家啲人淨係識慳錢，唔應慳都走去慳，唔係呀嘛，咁都拍到啲嘢？嗰啲唔使試喇，估到係唔好玩！你話你想發明一樣嘢，你都要有個材料、配套、空間，先整到火箭上月球，唔係是求其射啲嘢上天就算，要知邊啲係可取，邊啲係吹水。」
可取的，葛民輝做了，好彩香港有葛民輝。