【有片】張嘉兒孖囡囡宣佈懷第二胎 大女Leora：媽咪肚入面有BB
撰文：洪曉璇
出版：更新：
成日聽到老人家話有仔襯嫩生，除咗佢地恨抱孫之外，事實上年輕媽媽生育復原都快啲。港姐冠軍張嘉兒15年下嫁圈外男友，16年9月誕下囡囡Leora，之後就主力湊女，於網上分享母女間趣事。呢日嘉兒孖住囡囡拍片，宣佈懷有第二胎3個幾月，三年抱兩認真恭喜晒﹗
張嘉兒2016年9月誕下囡囡Leora。（張嘉兒IG）
明年生肖係豬，傳統話豬年出世會相當有福氣，咁啱明年真係相當多人排住隊生BB，張嘉兒呢日喺IG興奮宣佈成功追多個：「好想同大家分享一個喜訊就係我再一次懷孕啦。今次陀BB，比上一次辛苦同埋攰好多，真係每日淨係想黐住張床，不過係唔可以嘅，因為我仲要照顧我個女。作吐作悶嘅次數亦都多咗，聞到有油煙味都會感到不適。話雖如此，我好感恩同埋好開心上天送一份咁大嘅生日禮物俾我。」
張嘉兒話懷孕時嘅不適比第一胎來得更嚴重。（張嘉兒IG）
隨留言張嘉兒仲分享一條同囡囡拍嘅短片，佢問囡囡：「媽咪個肚有乜？」Leora答：「有BB。」張嘉兒再問：「有乜話？」Leora好肯定再答：「有BB。」最後囡囡Leora仲錫唾媽咪一啖添。嘉兒話：「一諗起將來多一個小朋友會帶俾我哋一家人嘅歡樂，所有辛苦都變得值得。有人話養兒100歲長憂99歲，計我話係長喜99至真。我依家真係好想我嘅energy快啲返嚟，等我可以計劃我嘅baby-moon。你話我去邊好呢意大利，馬爾代夫，定日本？」
+14