黃妍預告明年初出新歌：嘗試夏秋冬季節主題

樂壇女新人黃妍 (Cath) 今日出席英文教育活動，大談自己的偶像Taylor Swift。「我中學果陣最鐘意聽嘅外國歌手就係佢，我仲記得有次talent show我唱咗佢嗰首《Love Story》。當時係朋友推介下聽，慢慢就鐘意佢一路彈結他一路唱嗰個形象」，更即刻fangirl上身大叫Taylor「快啲黎香港啦！」直言若不是自己工作太忙，已經一早飛去東京捧偶像場。

Cath早前推出單曲《笑容迷路了》，歌詞反映了現代很多都市人心聲，「首歌係講我啱啱出黎社會做野，做一份好多人都做緊嘅沉悶工作，成日要OT，星期六日又無得放假，好辛苦。我發覺原來忙到無得玩音樂嘅日子係好唔開心，連笑都無咗嗰份感染力，好恐怖，於是就有呢首歌去排斥負能量。」Cath更透露《笑容迷路了》的MV場景和她現實生活有關聯：「我係MV入面唱歌嗰間cafe其實就係我被而家唱片公司發掘嘅地方，另外同導演商量過後再加入老伯伯嗰條故事線，保留返追尋迷失笑容嗰份情懷，所以我睇完個MV都覺得好窩心。」

Cath計劃在明年年頭出新歌，歌曲主題更會和之前的兩首歌呼應，猶如夏秋更替，秋去冬來一樣。「《如何從夏天活過來》係講夏天，《笑容迷路了》就隱約有秋天感覺，所以我下一首歌就諗住寫冬天，大家可以期待下。」另外Cath又希望有機會和同事小塵埃合作，指他們人前人後都非常友善，視他們為學習對象。

最後Cath亦說有留意香港網民對樂壇新人的批評，面對尖酸的留言Cath又有何感想呢？「其實我好開心佢地肯花時間去留言，因為咁樣代表佢地起碼有留意到我，我會慢慢去睇佢地嘅comment，慢慢去改善自己。」