【洪卓立湯怡分手】立立含淚講分手感受：佢唔係貪慕虛榮嘅人
洪卓立湯怡拍拖11年都分手，令不少人都覺得可惜，亦掀起網上駡戰，洪卓立今日（16日）現身英皇活動，忍著淚回應所有傳聞，而整個訪問中，他都為舊愛護航，他說：「同佢開始係11年前，11年前我第一隻碟都未出....中間自己經歷過大病，最唔好最唔順利嘅時候，其實佢都喺到嘅，可能大家見到好多表面嘅嘢，覺得佢係一個大家所講嘅貪慕虛榮嘅人，但我會答你唔係，亦都有話佢做咗套電影嘅女主角喇，紅咗成功喇....其實呢個係一個好好嘅機會，但係......唔係一個好成功嘅例子，或者唔係一個大成功，所以我哋都係繼續努力緊嘅，所以唔係大家所講嘅咁樣囉！我私底下同陳家樂講唔好意思，因為完全唔會諗到拉到佢落水嘅。而大家所講嘅網上面親密合照，佢（湯怡）有一個習慣係每一日都可以擺張相上去，同大家分享嘅，所以佢嗰日做咩就影咩，就係咁簡單，我知道大家都有支持者，但最起碼我哋三個都係好朋友，所以希望大家唔好再有其他駡戰出現。」
立立續說：「我同佢冇任何因為金錢嘅原因而走埋一齊嘅，亦唔存在佢黐我去上鏡，但問題係我都仲係好努力緊我嘅事業....我何來有資格令一個人上鏡呢？所以呢件事係唔存在嘅，其實我好難好簡單去解釋我哋有共識咁做呢樣嘢，我諗就係頭先所講因為了解而分開....好難去將兩個人嘅事情，好清楚明白咁講俾大家聽....我同佢關係仲好好，都每一日都keep住講關於呢件事嘅事情...作為好朋友嚟講，甚至男女朋友嚟講，我唔想佢俾人批判...所以今日我點解咁想講先，但係如果我講完大家都係唔相信嘅，咁都冇辦法喇。」
洪卓立愈說愈激動：「網上見到有人話呢個世界冇真愛㗎喇，11年都會散，咁sweet都會散，仲有咩雙魚座，我覺得每一段愛情都係獨立嘅，我希望大家同我一樣仲相信愛情，真係好老土，（朋友，家人有咩反應？）我諗大家都覺得可惜嘅，嗰件事出咗，公司同事都有提醒我，可能會有好多記者朋友揾你，好多記者或者朋友揾我，但佢哋都唔係問問題，大家都係好關心，咁亦都多謝大家，（係咪因為你成日打機？）絶對唔係啦，佢係好支持我喺電競嘅諗法。」