張曦雯承認跟英日混血兒戀情 不介意宅男心碎:咁冇理由唔拍拖
撰文:賴家杰
出版:更新:
自TVB電視劇《白色強人》開播後,張曦雯(Kelly)從未出席此劇集任何宣傳,原來她早前去了美國進修演藝課程。今天(7日)也是特意改機票提早回來香港,出席《白色強人》的宣傳活動,Kelly笑言:「其實我點都係呢幾日返香港,不過我就專登改機票尋晚返嚟。呢套劇播咗咁耐,我都冇宣傳,咁最後一個宣傳點都要同大家一齊加油。」
Kelly在接受《香港01》訪問時分享到這次美國進修演技之旅:「其實我初初係返咗去芝加哥探屋企人先,留咗兩星期之後就去洛杉磯讀書,讀演藝課程。其間有唔同老師教導我,真係學咗好多,希望接下來8月開新劇,會用到我呢一個月所學到嘅事。始終學習做戲係一件無止境嘅事,演戲係藝術,有好多事要學要鑽研,希望每一次都進步畀大家睇到。」
早前Kelly被傳媒拍到疑似是她男朋友的外籍男士一起聚餐,其後Kelly大方承受戀情,她說:「其實我同佢拍咗幾耐拖就唔講,但都係一件好開心嘅事,我都唔會去隱瞞。」男朋友不是圈內人,Kelly也想保護好他的私隱:「我覺得我工作上唔想講太多感情事,我唔想畀呢件事蓋過我工作。雖然都已經公開咗,但我都係會盡量低調。」
當然Kelly的男朋友隨即便給眾人起底,名叫BRUNYEZ,英日混血兒,也擁有健碩的身材。Kelly笑言男友很開心這樣的稱讚:「你哋讚佢身型完美比例,又讚大隻,又讚佢有風度,不知幾開心。當然都係我翻譯畀佢聽,咁都Ok嘅,佢知我做呢一行都預咗。」不少宅男心中也視她為女神,但是Kelly公布戀情,宅男們的心也碎了,Kelly表示:「咁冇理由唔拍拖,我都係一個正常人,如果我咁大個人都唔拍拖就好奇怪。」