傳無綫取消節目巡禮 郭羨妮:咁就要期待佢哋用咩新方法!

撰文:林迅景
出版:更新:

要數每年TVB重頭節目,除了台慶以及頒獎典禮外,就是無綫電視節目巡禮,而節目巡禮的重要性,其重要性又與前兩者不相伯仲,皆因這個節目會邀請廣告客戶到將軍澳參觀,實地感受一下電視城的制作以及讓廣告客戶近距離接觸一班藝人,實屬是「省靚招牌」兼搵錢的節目。不過今年卻因「需以較靈活方式去加強與廣告客戶之聯繫及溝通,直接向廣告客戶推介無綫來年之精彩節目」為由而取消。

郭羨妮真係好靚。(梁碧玲攝)

由1999年就已經參加無綫電視節目巡禮的香港小姐郭羨妮今日出席「香港兒童時裝周」活動,接受《香港01》時就表示自己近來忙於工作,沒有留意到節目巡禮被取消的消息。她說:「一到9月,10月好多嘢做㗎,個個都要着到好靚,要借好多鑽飾。今年唔搞吖?咁特別?」當記者向她解釋TVB想用新方法與客戶溝通後,她說:「咁就要期待用咩新方法啦,咁今年大家就唔使咁忙鬥珠寶啦。嗰時個個都要一千萬珠寶上身㗎嘛。」

郭羨妮表示自己參加了節目巡禮已有十多年。(梁碧玲攝)

她回憶道:「有保安跟住嘅,都幾驚㗎,咁多錢嘅嘢戴上身。(出現的藝人比台慶更多?)不嬲都係㗎,節目巡禮係曬冷㗎嘛,台慶就唔一定有份做㗎嘛(指沒有參與劇本拍攝就不用去台慶)。(參加了節目巡禮多少屆?)由我入去之後到我走囉。每一年都要去!呢個係Must,Cannot not go。」由朝到晚為這個節目準備,會辛苦嗎?她坦言:「兩睇啦,呢樣係宣傳嚟嘅,呢個工作應該係宣傳自己,如果唔做呢個Job,邊個識你啫,係咪先。」每年都要與客戶合照,會否辛苦?「我覺得係應該嘅,人哋請得你做代言,就梗係要影相啦,唔係請你做咩吖?」今年節目巡禮被取消,會不會可惜?「咁又唔關我事喎。」