傳張秀文拍劇借故親近 楊怡女助手貼身照顧  羅仲謙:冇所謂啦

撰文:吳子生
出版:更新:

羅仲謙今日(7/11)以嘉賓身份出席在銅鑼灣舉行的著名珠寶品牌活動。謙謙更即場戴上閃燿奪目珠寶,完美演繹出男士典雅魅力。謙謙笑言:「見到咁靚嘅珠寶鑽飾,都好想揀番件畀太太(楊怡),不過我太太佢有個習慣,佢希望日後嘅貴重嘅手飾或者嘅金器可以傳比下一代。」

羅仲謙與岑麗香今日出席著名珠寶品牌活動。(梁碧玲攝)

提到最近拍無綫劇《木棘證人》傳張秀文借故親近,氣得太太楊怡「插針」將自己的女助手貼身照顧謙謙跟出跟入,實行全天氣監視。謙謙就此表示:「其實對呢啲新聞得啖笑,大家一睇就知係娛樂新聞嚟啦,我太太亦冇在意,我自己又唔會因為呢啲新聞出咗後,會同佢哋會有避忌,因為我如果有避忌咪仲會畀人覺得有嘢,至於女助手,其實始終熟人幫手係會方便啲嘅,其實又唔係做啲乜嘢,其實都冇乜所謂啦。」