龔嘉欣投資過百萬搞火鍋店　跌爛匙羹感肉赤：兩蚊㗎！

龔嘉欣今日（3/1）出席無綫新劇《香港愛情故事》開鏡拜神儀式。提到在馬來西亞投資過百萬「升呢」做火鍋店老闆，嘉欣坦言試過成個月留在店舖幫手，更稱原來見到跌爛支匙羹都感到肉赤心痛：「上次試過有個人嚟影相，佢嘅腳架掃跌咗支匙羹，因為支匙羹兩蚊，跟住我係間舖就大叫兩蚊㗎，跟住啲員工就望住我，亦試過有人打爛隻碟，我就衝入廚房大聲問邊個打爛隻碟，不過佢哋係知我唔係責怪佢哋嘅，只不過係想大家小心啲囉。」對於有傳她秘戀馬來西亞富二代Bryan，嘉欣坦言大家只是好朋友關係，現時仍是單身。