【早霸王】女聽眾報喜不報憂激嬲男友 小儀:呢個唔係正常關係
撰文:鄺鈺瑩
出版:更新:
又到《早霸王》嘅「你知道唔知道有人掛住你」環節,女聽眾阿B原來話想想表白,但當小儀同Marco細問時,阿B又話想道歉,事因佢掛住陪屋企人而冷落咗男友。「因為爸爸有病,我怕會miss咗醫院電話,所以拍拖時成日睇住電話。」緊張屋企人實屬正常,但男友如果咁都唔體諒,又係未有問題呢?阿B話原來佢無同男友詳細講過爸爸生病一事。「我唔夠膽話佢知,因為怕佢覺得好煩。」
呢個邏輯相信唔止小儀同Marco都唔明白,但阿B就似乎唔得有太大問題,並表示唔想因為自己家事要煩到男友,令對方有壓力:「如果想將來一齊、有家庭的話,唔想突然要佢孭起呢份責任。」問到平時係未好多嘢都收收埋埋,阿B就話:「平時好多嘢講,但有時佢收工好攰,我講啲八婆嘢時佢好似會好煩咁。」就係咁,阿B決定咩都唔講。小儀表示八婆嘢其實應該係女性友人分享,又指阿B應該多啲同男友溝通。「要令佢知道你需要佢,大家有嘢要一齊分擔。」電話接通男友John之後,阿B對於自己之前嘅冷落作出道歉,又承諾會多啲同男友分享心事。