【每逢大事講故事】話唔做又做的素人...總理 再掀意大利危機

撰文:飛雲
出版:更新:

小弟飛雲後生嗰陣,除左鍾意睇意大利波,最鍾意睇意大利政壇新聞,貪貝老夠淫賤,夠過癮。不過家陣意大利政壇成班麻甩佬,全部悶del del咁。不過如果大家關心錢,都應該都要理解下意大利發生緊咩事,歐美股市都被佢搞到全線下挫。
大家都知,意大利呢幾年換總理換過不停,早幾日選出來嘅政治素人孔特(Giuseppe Conte),個名夠晒Italiano,但似乎唔係好powerful。做左四日,本來話辭職,依家又話繼續做,媽我好亂呀!
今次飛雲現真身,記得Click入去睇片呀喂~

意大利人有時真係巧打耳~搞唔掂個場就搬個學者出黎,2014年搵經濟學者蒙蒂(Mario Monti)做總理,你仲記唔記得邊個呀?呢,白頭髮,戴金絲眼鏡嗰個阿伯呢!​

唔係嗰個呀,係下面e個呀。Sorly 我地啲亞洲人成日覺得啲白人都差唔多樣,認錯左鄧不利多。下面呢個先係蒙蒂,真係隔住個mon都聞到智者嘅味道呀。

不過學貝老講句,智者有L用咩,搵親教授做總理都無好結果。蒙蒂的成績如何,你的日子.... i mean大家有眼睇,意大利呢幾年經濟、民生都無好過,仲變得越來越民粹。蒙蒂之後,仲有執政只有一年嘅萊塔,之後仲有做得兩年貨仔嘅倫齊,之後到依家的看守總理真蒂洛尼,不過,你都還未記得佢,佢就真退落黎喇。人事變得快,唯一不變嘅就係意大利嘅債務問題,依然係咁衰。

依家又端出另一個professeur出來。如果佢去教書嘅話,睇佢CV的確無得輸!喂,但政治上,佢係白紙一張喎,就同余文樂演衛斯理一樣,咁無說服力。

不過你睇,余生眼神都識做戲架!孔生做總理,又交左咩戲先?不如等飛雲講解下孔特呢位政治素人嘅出處先。

查實佢本來就是一位就教佛羅倫斯大學的法律系教授,都係2013年先加入左翼民粹政黨五星運動,兼且係迪馬約嘅代表律師,本來只是個二打六,處理下啲法律事務,點知由一個Law友,變左做總理。有美國傳媒形容佢係「意大利將有一位聞所未聞的總理」, 有位歐盟官員都話,「無人知佢係乜水,學者黎講又唔算有名氣」。

這位是Robert Kelly,同埋佢個得意囡囡,孔特一定唔夠佢出名。

名氣好重要架,你點知Ben Sir會唔會有日做咗教育局局長?不過意大利總理呢個位,同教育局局長一樣,根本就係三煞位。孔特未上台已經注定係做扯線公仔。到底邊個擺佢上枱先?

咁就要講返三月嘅意大利國會選舉,反建制嘅五星運動同反移民嘅右派聯盟,可以話平分秋色,各自攞到三成幾選票,唯有死死地氣坐底傾,籌組聯合政府。

呢個就係本來全歐洲都無人識嘅孔特喇。

雖然右派聯盟,貝老係其中一條台柱,但五星運動就係嬴一個馬鼻,做左最大黨,佢地領袖迪馬奧四月初就講到明,傾咩都得,但新政府一定唔可以有貝老呢個「老而不」,右派聯盟唔可以拉埋貝老一齊組閣。皆因呢位30出頭嘅後生仔,唔想同老人政治扯上關係,仲叫右派聯盟嘅boss薩爾維尼,攝高枕頭諗清楚,係咪攬住貝老過世。​

搞左一大輪都無共識,兩個黨都知道再傾唔掂數,意大利人隨時又嘈,「喂一人讓一步啦」,於是迪馬約就退一步話唔再追擊貝老,提名左自己個律師孔特出來上,叫薩爾維尼哽左佢啦。孔特話晒都係法律權威,似乎都可以幫到下修憲,最重要係無乜政治背景,身家清白,望落呢個素人真係幾pure幾true喎。

佢有幾pure?大學有個friend子話,孔特是個文質彬彬的學術型,未聽過佢咆哮,發嬲,份人好腍,把口合埋仲多過講嘢嘅。意大利政壇早已經七國咁亂,好多姨媽姑姐聽到世姪失驚無神做左總理,都好擔心佢。其中佢呀媽個朋友,由細睇住佢大,就話daddy mami好擔心,「你知啦,意大利政壇啲人會掟泥架!」

無辦法,素人通常都比較多人J,孔特未上場就比傳媒起底,翻晒啲學術背景出來,質疑佢學歷造假,CV話自己去過紐約大學深造,點知大學話無呢個人嘅record喎!咁佢啲黨友就唯有死雞撐飯蓋,話:

唉,你地唔好咁咄咄逼人啦,佢可能都唔想做呢!其實佢都蠢唔晒,又或者佢真係驚被人掟泥,孔特唔知有心定無意,提名左一位疑歐派人物做財長,即刻被總統馬塔雷拉(Sergio Mattarella )DQ左。孔特就話,咁我唔做了,比個大信封我。飛雲呢刻終於明白到,意大利總統原來係咁有用,佢喺關鍵時刻的確係可以拯救歐洲的,好威武。

總統你好有型呀!

孔特做左四日就辭職,依家點收科呀?五星運動嘅迪馬約就話,不如總統一齊傾下內閣人選啦,財長可以揀過個架,「大家可以一齊講、一齊聽,有商有量。」但右派聯盟嘅薩爾維尼就唔係咁睇喎,上次大選屈居做阿二,呢排佢支持率高左,梗係死都寧願重選啦。依家總統就話可以比多啲時間你地再組閣,兩個黨又要坐底傾過。

峰迴路轉,孔特嘅機會又來了!!!!居然再次傾嘅內閣名單,得同總統同意了,孔特就這樣又做番意大利總理。哈,唔知佢今次坐得幾耐呢,小弟就買定花生放長雙眼睇下先。

其實呢,即使比佢地再重選,依家意大利人都係會選番五星運動或右派聯盟是,掌政嘅始終會係一個民粹,疑歐嘅政府。的而且確,意大利市面上有唔少阿伯阿毛,都好渴望有生之年,意大利可以退出歐元區,有啲阿毛甚至己經將手上嘅歐元,兌換番做意大利舊日貨幣里拉,仲相信五星運動可以救佢地出苦海。國際金融市場今鋪真係有得震無得瞓,因為佢地成班都癲架,成個意大利最正常嘅應該都係得祖雲達斯,飛雲都係轉行講波好過。